Rusiya bazarı bağlandı, Avropa da qapıları tam açmır: Ermənistan çıxılmaz vəziyyətdə

Başlıq: Ermənistan Aİ bazarında çətinliklə üzləşdi: İxracatçılar bürokratiyadan şikayətlənirlər

Ermənistanın Avropa İttifaqına (Aİ) kənd təsərrüfatı məhsulları ixrac edən şirkətləri və yükdaşıyıcıları gömrük prosedurlarının uzanması və bürokratik maneələrin artmasından narazıdırlar.

Publika.az xəbər verir ki, bu barədə Ermənistanın "Joqovurd" qəzeti yazıb.

Nəşrin məlumatına görə, Ermənistan yük maşınları Aİ ölkələrində uzun müddət gömrük yoxlamasından keçirilir, möhürlənir və günlərlə terminallarda saxlanılır. Bir çox hallarda əlavə yoxlamalar və digər inzibati prosedurlar tətbiq olunur ki, bu da xüsusilə kənd təsərrüfatı və tez xarab olan məhsulların ixracı zamanı ciddi itkilərə səbəb olur.

Qeyd olunur ki, rəsmi İrəvan Avrasiya İqtisadi İttifaqında (Aİİ) fəaliyyətini davam etdirdiyini bəyan etsə də, eyni zamanda Avropa İttifaqı ilə inteqrasiyanı sürətləndirməyə çalışır. Rusiya isə dəfələrlə bildirib ki, Aİİ və Aİ ilə paralel inteqrasiya mümkün deyil.

Nəşr xatırladır ki, Avropa Komissiyasının sədri Ursula fon der Lyayen İrəvana səfəri zamanı Ermənistanın təzə kənd təsərrüfatı məhsullarının 99%-i, içki və alkoqollu məhsullarının isə 90%-i üçün Avropa bazarının açılacağını vəd etmişdi. Lakin ekspertlər hesab edirlər ki, Aİ-nin ayırdığı maliyyə dəstəyi fermerlərin itkilərini kompensasiya etmək üçün kifayət etmir.

Hazırda Rusiyada konservləşdirilmiş məhsullar istisna olmaqla, Ermənistandan bitki mənşəli məhsulların idxalına ciddi məhdudiyyətlər tətbiq edilir. Bundan başqa, Ermənistanın bütün müəssisələrindən balıq məhsullarının Rusiyaya ixracı da məhdudlaşdırılıb. Halbuki, ölkənin ixracının 90 faizdən çoxu məhz Rusiyanın payına düşür.

Akqabay