Paşinyan və Tramp arasında telefon danışığı - Hər iki xalqın hiss etdiyi əsl sülh yaranıb

Ermənistanın Baş naziri Nikol Paşinyanla ABŞ Prezidenti Donald Tramp arasında telefon danışığı olub.

Publika.az xəbər verir ki, bu barədə News.am məlumat yayıb.

Bildirilib ki, Baş nazir ABŞ liderinə 2025-ci il avqustun 8-də Vaşinqtonda, Ağ Evdə Sülh Sammitini təşkil etdiyinə, Ermənistan və Azərbaycan liderlərinin qəbul etdiyi Sülh Bəyannaməsini şahid qismində imzaladığına görə təşəkkür edib və sülhün bərqərar olunmasında Prezident Trampın şəxsi səylərinin həlledici əhəmiyyət daşıdığını vurğulayıb.

Həmsöhbətlər məmnuniyyətlə qeyd ediblər ki, Vaşinqton Sülh Sammiti Ermənistan və Azərbaycan arasında hər iki ölkənin xalqlarının gördüyü və hiss etdiyi əsl sülhə gətirib çıxarıb. Telefon danışığı zamanı TRIPP layihəsinin həyata keçirilməsinin cari vəziyyəti müzakirə olunub.

Baş nazir Paşinyan və Prezident Tramp yaxın gələcəkdə TRIPP-in tikinti işlərinə başlamaq əzmində olduqlarını bir daha təsdiqləyiblər.

Söhbət zamanı həmçinin Ermənistan-ABŞ ikitərəfli və beynəlxalq gündəliyinin digər məsələləri də müzakirə olunub.

Hüseyn İbadlı