Kobaxidzedən Qərbə ittiham: Gürcüstanı “ikinci cəbhə”yə çəkmək istəyirlər

Gürcüstanın Baş naziri İrakli Kobaxidze ölkəsində Rusiyaya qarşı radikal mövqelərin süni şəkildə qızışdırıldığını iddia edib.

Publika.az xəbər verir ki, Kobaxidze Gürcüstan nümunəsinin radikal anti-Rusiya əhval-ruhiyyəsinin əsassız olduğunu göstərdiyini bildirib.

Baş nazirin sözlərinə görə, “dərin dövlət” Gürcüstanda rusofobiyanı süni şəkildə gücləndirmək və ölkəni yeni qarşıdurmaya cəlb etmək üçün müxtəlif vasitələrdən istifadə edir.

Kobaxidze iddia edib ki, 2022-ci ildə Ukraynada müharibə başladıqdan sonra müəyyən qüvvələr Gürcüstanın münaqişəyə qoşulması və ölkədə “ikinci cəbhə” açılması üçün təzyiq göstərib.

O, həmçinin Rusiyaya qarşı tətbiq olunan sanksiyalara qoşulmaq tələbinin Gürcüstan iqtisadiyyatına zərər vurmaq məqsədi daşıdığını bildirib.

Baş nazir Qərbin müxtəlif siyasi və iqtisadi təzyiq vasitələrindən istifadə etdiyini və Gürcüstanın suveren siyasət yürütməsinin ölkəni hədəfə çevirdiyini iddia edib.

Kobaxidze hazırkı vəziyyəti Gürcüstana qarşı “yeni hücum mərhələsi” adlandıraraq, cəmiyyətin bu proseslər barədə məlumatlandırılmasının vacib olduğunu vurğulayıb.

Akqabay