Yüksək posta gətirilən Simonyan onlara mesaj göndərdi - “Ortalığı qurdalamasınlar”

Ermənistan Təhlükəsizlik Şurasının yeni katibi Alen Simonyan fəal ictimai siyasətçi kimi qalmaq və yalnız təhlükəsizlik məsələləri barədə deyil, həm də daxili siyasi vəziyyət haqqında açıq şəkildə fikir bildirmək niyyətində olduğunu bəyan edib.

Publika.az xəbər verir ki, o, bu barədə 24news.am portalına müsahibəsində danışıb.

O, həmçinin deputatları onun adından lüzumsuz yerə istifadə etməməyə çağırıb və tənqidlərə hansı şəkildə cavab verəcəyini özünün müəyyən edəcəyini bildirib.

Simonyan müxalifət nümayəndələrinin, o cümlədən Ermənistanın ikinci prezidenti Robert Koçaryan və “Güclü Ermənistan” partiyasının lideri Samvel Karapetyanın ünvanına səsləndirdiyi sərt bəyanatları şərh edərkən ictimai qiymətləndirmələrdə özünü məhdudlaşdırmağı vacib hesab etmədiyini deyib.

“Mən, əlbəttə ki, həmkarlarımın mövqeyini bölüşürəm, lakin reaksiya verdim. Qoy ortalığı qurdalamasınlar. İndi bu binada işləməməyim onlara hər əlverişli və ya əlverişsiz məqamda mənə istinad etmək hüququ vermir”, — deyə Simonyan bildirib.

Onun sözlərinə görə, ünvanına səslənən bəyanatlara necə cavab verəcəyini özü müəyyən edəcək.

“Müəyyən məqamda necə reaksiya verəcəyimə özüm qərar verəcəyəm. Əgər haradasa və hansısa məsələdə müəyyən sərhədi aşsam, hesab edirəm ki, həmkarlarımın, dostlarımın və ya müvafiq strukturların öz fikirlərini bildirmələri üçün müvafiq hüquqi və partiyadaxili mexanizmlər mövcuddur. Lakin mən artıq çoxdan ictimai siyasətçiyəm”, — deyə o bəyan edib.

Simonyan həmçinin Təhlükəsizlik Şurasının katibi vəzifəsinin ictimai şərh və açıqlamalarda xüsusi qapalılıq və təmkinlilik tələb etməsi barədə təsəvvürü rədd edib.

“Bu, bir stereotipdir. Mən Təhlükəsizlik Şurasının fəal katibi olacağam, zəruri hesab etdiyim zaman daxili siyasətlə bağlı məsələlərə dair fikir bildirəcəyəm. Mən sizə müsahibələr verəcəyəm”, - deyə o qeyd edib.

Simonyanın sözlərinə görə, müasir informasiya məkanında vəzifəli şəxslər tutduqları postun ətrafında əlçatmazlıq və sirli mühit obrazı formalaşdıra bilməzlər.

“Biz informasiya əsrində yaşayırıq, artıq heç nəyi gizlətmək mümkün deyil. Və "bu vəzifə belədir, sən belə görünməlisən, belə danışmalısan" kimi mistikanı geridə qoymaq lazımdır. Çox adam belə ciddi sifət ifadəsi və bu cür təsəvvürlərlə elə axmaqlıqlar edib ki, xalqımız onların fəsadlarını indiyədək aradan qaldırmağa çalışır”, - deyə Təhlükəsizlik Şurasının katibi bildirib.

O əlavə edib ki, ictimai davranışını yüksəkvəzifəli şəxsin statusu haqqında formalaşmış təsəvvürlərə uyğunlaşdırmağı vacib hesab etmir.

“Bunu işıqlandırmaq istəmirsinizsə, işıqlandırmayın. Əgər bu sizin üçün maraqlı deyilsə, işıqlandırmayın. Lakin hesab edirəm ki, bu, bir stereotipdir, özü də köhnəlmiş stereotip”, - deyə Simonyan vurğulayıb.

Hüseyn İbadlı