Ermənistanda ad dəyişikliyi - Süni İntellekt Nazirliyi yaradıldı

Ermənistan parlamenti üç nazirliyin adının dəyişdirilməsini nəzərdə tutan qanun layihəsini ikinci və yekun oxunuşda qəbul edib.

Publika.az xəbər verir ki, bu barədə respublika parlamentinin spikeri Ruben Rubinyan məlumat verib.

O dəqiqləşdirib ki, “Hökumətin strukturu və fəaliyyəti haqqında” qanuna və əlaqəli qanunlara dəyişikliklərin lehinə 64 deputat səs verib, 26 deputat isə əleyhinə çıxıb.

Beləliklə, Xarici İşlər Nazirliyinin adı Xarici İşlər və Beynəlxalq Ticarət Nazirliyi, Əmək və Sosial Məsələlər Nazirliyinin adı Əmək və Rifah Nazirliyi, Yüksək Texnologiyalar Sənayesi Nazirliyinin adı isə Yüksək Texnologiyalar Sənayesi və Süni İntellekt Nazirliyi olaraq dəyişdirilib.

Dəyişiklikləri təqdim edən Ermənistanın ədliyyə naziri Srbui Qalyanın sözlərinə görə, dəyişikliklərin məqsədi xarici siyasət və iqtisadi əməkdaşlığın daha səmərəli şəkildə uzlaşdırılması, sosial problemlərə reaksiya ilə paralel olaraq insanların və ailələrin rifahının daim yaxşılaşdırılması, eləcə də süni intellektin inkişafıdır.

Hüseyn İbadlı