"Biz hələ təzə-təzə dövlət oluruq" - Mirzoyandan ETİRAF

Ermənistanın müstəqilliyinin 35 illiyi ərəfəsində təxminən 250 gəncin iştirakı ilə “XİN rəhbəri ilə söhbət: müstəqillik və xarici siyasət” başlıqlı müzakirə təşkil olunub.

Publika.az News.ama-a istinadla xəbər verir ki, iştirakçıları salamlayan nazir Mirzoyan qeyd edib:

“İki gündən sonra – sentyabrın 21-də biz Ermənistan Respublikasının müstəqilliyinin 35 illiyini qeyd edəcəyik. Bir tərəfdən, bu, tam yetişmək və həyata hazır olmaq üçün kifayət qədər uzun müddətdir. Digər tərəfdən, tarix baxımından bu, bir göz qırpımıdır. Bir tərəfdən, əgər geri nəzər salsaq, biz 35 il ərzində xeyli dərəcədə formalaşa bilmişik. Sizinlə tamamilə səmimi olmaq istəyirəm. Məndə elə bir təəssürat var ki, biz hələ təzə-təzə dövlət oluruq, obyektiv və ya subyektiv səbəblərdən biz əsl, müstəqil dövlətə sahib olmaq istiqamətində ilk addımları atırıq. Bu özünü, ilk növbədə və əsasən xarici siyasət sahəsində, digər dövlətlərlə münasibətlərimizdə büruzə verir”.

Görüşdə Ermənistan ətrafında əlverişli təhlükəsizlik mühitinin qorunub saxlanılması və gələcək inkişafı, qonşu dövlətlərlə münasibətlər, regional infrastrukturların blokdan çıxarılması məsələləri ətraflı müzakirə olunub, həyata keçirilən proqramlara toxunulub.

"Siyasətlə məşğul olmağa can atan gəncə nə məsləhət görərdiniz" sualına Ararat Mirzoyan belə cavab verib:

“İnsanı siyasətə xəyalları aparır, buna görə də mənim məsləhətim odur ki, xəyal etməkdən əl çəkməyəsiniz və onları həyata keçirmək üçün mübarizə aparmaqdan yorulmayasınız, durmadan çalışasınız, reallıqları dəyişməyə çalışasınız”.

Hüseyn İbadlı