Təhlil
AXC iqtisadiyyatının prioritet istiqamətləri
1918-20-ci illərdə mövcud olan və cəmi 23 ay fəaliyyət
göstərən Azərbaycan Xalq Cümhuriyyəti (AXC) hər bir azərbaycanlının
qürur mənbəyidir. Cəmi 23 ay fəaliyyət göstərməsinə baxmayaraq
tarixi uğurlara imza atan Cümhuriyyət iqtisadi uğurları ilə də
yadda qaldı.
AXC dövründə də neft ölkə iqtisadiyyatın aparıcı sahəsi idi. O
zaman neft həm də dünyada aparıcı mövqeyə malik idi. Bunu çox gözəl
anlayan hökumət üzvləri dünyanın neft bazarı ilə bağlı məlumatlar
əldə edir, təhlillər aparırdı.
Azərbaycan neftinin alıcısı ilk illərdə Rusiya olsa da, sonradan
Avropa ölkələri də bu prosesə qoşulub. Rusiyada inqilab nəticəsində
Azərbaycan neftinin ixracı nəzərəçarpacaq dərəcədə azaldı. Şimal
bazarının bağlanması nəticəsində 1919-cu ildə hasil edilmiş 3,6
milyon ton neftin yalnız 600 min tonu ixrac edilmişdi. Neftin
Avropaya göndərilməsi yalnız 1919-cu ilin martında 3 milyon ton
neftin ötürülməsini təmin edə bilən 500 kilometrlik Bakı-Batumi
neft boru kəmərinin bərpasından, eləcə də Bakı-Culfa dəmir yolunun
tikintisinin sürətləndirilməsindən sonra mümkün oldu. Neft
ixracının artması ölkəmizdə bütün istehsalat sahələrinin inkişafına
təkan verdi.
Qeyd edək ki, demokratik respublikanın mövcud olduğu dövr ərzində
1918-ci ildə 3287 yataqdan 185,6 pud (2,96 milyon ton) neft,
1919-cu ildə isə 2066 yataqdan 225,1 pud (3,6 milyon ton) neft,
1920-ci ildə isə 2037 yataqdan 175,1 pud (2,8 milyon ton) neft
çıxarılıb.
Neft Azərbaycanda ixracatın əsas mənbəyi olduğundan hökumət onunla
əlaqədar əvvəlki dövrlərdə olan iqtisadi əlaqələri bərpa etməyə
çalışırdı. Rusiya bazarı respublika üçün itirildiyindən bütün
diqqəti Azərbaycanın dünya bazarına neft ixracına imkan verən
Bakı-Batumi neft kəmərindən istifadə etməyə yönəltmək lazım
gəlirdi. Bu kəmərin taleyi çox mürəkkəb idi. Onun tikintisinə hələ
XIX əsrin sonlarında - 1897-ci ildə başlanmış, 1907-ci ilin
iyulunda isə başa çatdırılmışdı. Ümumi uzunluğu 830 kilometr olan
neft kəməri Zaqafqaziya dəmir yolu boyunca uzanıb gedirdi. Bakı
neft sənayeçiləri onun inşasına lap başlanğıcda etiraz etmişdilər.
Uzun və gərgin mübarizədən sonra Zaqafqaziya Dəmir Yolu İdarəsinə
Bakı-Batum magistral boru xəttini yol boyu inşa etməyə icazə
verilmişdi. Amma bu dəfə kəmərlə ağ neftin nəqli nəzərdə
tutulduğundan onun inşasına neft sənayeçiləri etiraz etmədilər.
Çünki bu halda Bakı neft emalı zavodları sahiblərinə Qara dəniz
sahillərində rəqiblər meydana gəlməsi təhlükəsi sovuşur, Bakının
mövqeyi neft emalı sənayesi mərkəzi kimi möhkəmlənirdi. Təəssüf ki,
sonralar, 1917-ci il iyulun 1-də ağ neft kəməri qara neft kəmərinə
çevrildi. Azərbaycanın müstəqilliyi elan olunduğu məqamda neft
kəməri işləmirdi və Bakı-Batum marşrutu ilə neftin ötürülməsi
yalnız 1918-ci il dekabrın 12-də bərpa olundu. Bunun ardınca
1918-ci il dekabrın 26-da Azərbaycan və Gürcüstan arasında
“Azərbaycan dəmir yolunun Zəyəm stansiyasından Gürcüstan dəmir
yolunun Saloğlu stansiyasınadək neft ötürülməsinin müvəqqəti
qaydaları” haqqında tranzit müqaviləsi bağlandı.
Qeyri neft sahələri - aqrar sektor
Maraqlıdır ki, neft aparıcı sahə hesab olunsa da Azərbaycan daha
çox aqrar ölkə kimi tanınırdı. AXC-nin aqrar proqramının əsasını
aqrar islahatı haqqında “Müsavat” fraksiyasının və Torpaq
Nazirliyinin nöqteyi-nəzərini əks etdirən qanun layihələri təşkil
edirdi. Göstərilən qanun layihələrinin müəyyən fərqlərinə
baxmayaraq, məqsədi torpaqsız və aztorpaqlı əhalini torpaqla təmin
etməkdən ibarət idi. Həm də xüsusi torpaq mülkiyyətini ləğv etmək
deyil, torpağı xüsusi mülkiyyətə elə istehlak normaları üzrə vermək
nəzərdə tutulurdu ki, bir tərəfdən kənd əhalisini gəlirlə təmin
etmək mümkün olsun, digər tərəfdən istifadəsiz xüsusi sahibkar
torpaqları qalmasın.
“Müsavat” fraksiyasının qanun layihəsində torpaqların əvəzsiz
verilməsi, digər qanun layihəsində isə müəyyən əvəz müqabilində
verilməsi əksini tapıb. Birinci qanun layihəsində əvvəlki
sahibkarların mülkiyyətində 75 desyatin, digər qanun layihəsində
isə yerli şəraitdən asılı olaraq müxtəlif miqdarda torpaq sahəsinin
saxlanması müəyyənləşdirilmişdi.
AXC-nin ilk illərində torpaq məsələsi əvvəlki kimi həllini gözləyən
başlıca məsələlər sırasında qalırdı. 1918-ci il iyunun 22-də
Azərbaycan hökumətinin aqrar sahə ilə bağlı qəbul etdiyi qərarda
Zaqafqaziya Seymi tərəfindən torpaq islahatına dair qəbul edilmiş
qanunun icrasının Müəssislər Məclisi çağırılanadək təxirə
salınması nəzərdə tutulmuşdu. Həmin vaxta qədər istər xüsusi
şəxslərin, istərsə də dövlətə məxsus olan zəbt edilmiş torpaqların
geri qaytarılmasını, torpaq məsələsinə dair tezliklə lazımi
məlumatların toplanmasını, bədəl (vıkup) tədiyələri haqqında
məruzələrin təqdim edilməsini, yaxın müddətdə torpaq
komissiyalarının yenidən qurulması və ləğv edilməsi haqqında
məruzələrin təqdim olunmasını nəzərdə tutan bu qərar torpaq
münasibətlərinin çözülməsində tələskənliyə yol verilməməsi ilə
bağlı idi.
Torpaq komissiyalarının vəzifələrinə torpaq sahəsi əldə etmək
istəyən hər bir kənd icmasının, yoldaşlığın, ayrı-ayrı şəxslərin
torpaqlarının olub-olmamasının yoxlanması, torpaqla təmin ediləcək
şəxslərin sayının, hər bir kənd icması üçün tələbatına uyğun torpaq
normasının müəyyənləşdirilməsi, dövlət və xüsusi sahibkar
torpaqlarının hesabatının aparılması daxil idi.
Mülkiyyət hüquqları
AXC öz iqtisadi platformasında mülkiyyət plüralizminə xüusi önəm
verirdi. Burada dövlət mülkiyyəti, xüsusi, şəxsi, səhmdar,
bələdiyyə mülkiyyəti formalarının və digər mülkiyyət formalarının
inkişafı üçün bərabər imkanlar yaradılırdı. O zaman geniş yayılmış
bolşevizm mövqeyindən fərqli olaraq AXC və onun liderləri fabrik,
zavod, torpaq və digər əsas istehsal vasitələri üzərində xüsusi
mülkiyyəti rədd etmirdilər.
AXC-də xüsusi mülkiyyətin miqyası müəyyənləşdirilir, bu işdə ifrata
varmağın zərərli olduğu göstərilirdi. Qeyri-məhdud mülkiyyət hüququ
və mənimsəmədə ifratçılıq mülkiyyətin yoxluğu qədər zərərli hesab
edilirdi. AXC-nin iqtisadi modelində nəzərdə tutulurdu ki, xüsusi
mülkiyyətin mövcudluğu mülkiyyətin tamamilə xırdalanmasına aparıb
çıxarmamalıdır. Xüsusən də fabrik və zavodların bu cür xırdalanması
qeyri-mümkündür və “burada çalışan əməkçinin işdəki mövqeyi xüsusi
surətdə hazırlanan əmək haqqında qanunların tətbiqi ilə təmin
olunmalıdır”. Respublikanın yaratdığı iqtisadi qanunçuluğa görə,
dövlət mülkiyyətinə və qismən də bələdiyyə mülkiyyətinə “dövlətin
sərvət və gəlir qaynağını təşkil edən yeraltı mədənlər”, həmçinin
“dəmiryolu, işıq, su, teleqraf və s. bu kimi ümumi işlərə xidmət
edən sahələr” daxil edilirdi...
Sosial siyasət
Cümhuriyyətin fəaliyyətində sosial yönüm də diqqət mərkəzində olan
xüsusi sahələrdən idi. Bu, təsdiq olunan qanunlarda və həyata
keçirilən konkret tədbirlərdə özünü göstərirdi. İstiqlalın görkəmli
öndərləri olan Məhəmməd Əmin Rəsulzadə, Fətəli xan Xoyski,
Əlimərdan bəy Topçubaşov və başqalarının sosial-iqtisadi
baxışlarında elə bir demokratik cəmiyyətin qurulması nəzərdə
tutulurdu ki, orada vətəndaşlar arasında siyasi bərabərliyin
bərqərar edilməsi ilə yanaşı, sosial ədalətsizlik də aradan
götürülsün.
Cümhuriyyət dövründə hökumətin ilk kabinetində Əkinçilik və Əmək
naziri vəzifəsi “Hümmət” partiyasından Milli Şuraya üzv seçilmiş
Əkbər ağa Şeyxülislamova həvalə olunub. Peterburq Yol Mühəndisliyi
İnstitutunun məzunu olan Şeyxülislamov İstiqlal Bəyannaməsinin
qəbulunda iştirak edib.
AXC-nin rəhbərliyi dövlətin sosial siyasətini həyata keçirmək üçün
ümumi daxili məhsulda istehlak fondunun payının artırılması,
əhalinin hər nəfərinə görə istehlak fondunun, ümumi daxili məhsulda
milli gəlirin və məşğulluq səviyyəsinin artırılması, əmək
şəraitinin yaxşılaşdırılması, təhsil, səhiyyə, mənzil və kommunal
təminatı səviyyəsinin yüksəldilməsinə nail olmaq nəzərdə tutmuşdu.
Lakin mürəkkəb beynəlxalq və daxili vəziyyət, iqtisadi çətinliklər,
yoluxucu xəstəliklər, keçmiş İrəvan quberniyası ərazisində
ermənilərin soyqırımına məruz qalan 150 mindən çox soydaşlarımızın
tarixi vətənlərindən didərgin düşərək Azərbaycana pənah gətirməsi,
əhalinin çoxluğunu təşkil edən kəndlilərin həyat şəraitini
yaxşılaşdırmağın əsas amili olan torpaq məsələsinin həll olunmaması
və s. sosial vəziyyəti xeyli çətinləşdirirdi. Belə ağır şəraitdə
Azərbaycan Xalq Cümhuriyyəti Parlamenti və hökuməti sosial
gərginliyi aradan qaldırmaq məqsədilə təxirəsalınmaz tədbirlər
həyata keçirib.
Xalq Cümhuriyyətinin fəaliyyəti dövründə parlamentin müzakirəsinə
müxtəlif sahələrə aid 315 qanun layihəsi təqdim olunub və onlardan
10-u sosial sahəni əhatə edib. Pensiya məsələləri üzrə iki əsas
qərar qəbul edilib və onlardan biri 1918-ci il avqustun 28-də
verilən “Pensiya haqqında qanun layihəsinin tərtib olunması üçün
komissiya yaradılması haqqında” qərar idi. Qərarda istefaya
çıxanlara xidmət illərinə görə pensiya təyin olunması nəzərdə
tutulurdu. Cümhuriyyətin fəaliyyəti dövründə Bakı şəhərində Əmək
Birjası fəaliyyət göstərib. Birja 1918-ci il yanvarın 13-də Bakı
şəhər Dumasında yaradılmışdı.
1918-ci il dekabrın 26-da 14 nəfərdən ibarət üçüncü koalisyon
hökumət təşkil edilib. Hökumətdə Poçt, Teleqraf və Əmək naziri
vəzifəsinə Sankt-Peterburq Universitetinin hüquq fakültəsinin
məzunu Aslan bəy Səfikürdski təyin olunub. Onun rəhbərliyi dövründə
hökumət fəhlələrin ağır iş rejimi və sosial vəziyyətini nəzərə
alaraq əmək haqlarının, müavinətlərin artırılması, əmək
münasibətlərinin rəsmiləşdirilməsi və s. ilə əlaqədar bir sıra
tədbirlər həyata keçirib.
Parlamentin 1919-cu il yanvarın 21-də qəbul etdiyi qərarla Xalq
Cümhuriyyəti hökumətində əmək münasibətləri və onunla əlaqədar
digər məsələləri tənzimləmək məqsədilə Əmək Nazirliyi təsis edilib.
İcra və nəzarətedici səlahiyyət əldə edən Əmək Nazirliyi 1919-cu il
yanvarın 25-də fəhlələrin əməyinin mühafizəsi və məişət şəraitinin
yaxşılaşdırılması məqsədilə xüsusi müşavirə keçirib. Müşavirədə
tərəflərin bərabər təmsil olunması şərti ilə fəhlə və müəssisə
sahibləri daxil olmaqla 19 nəfərdən ibarət xüsusi komissiya
yaradılması qərara alınıb. Yanvarın 26-da isə nazirlik kollektiv
müqavilənin şərtlərində bir sıra dəyişikliklər edilməsi barədə
qərar çıxarıb.
Hökumətin fəaliyyəti fəhlə qanunvericiliyinin formalaşdırılmasına,
fəhlə və sahibkarlar arasında münasibətlərin tənzimlənməsinə,
əməyin mühafizəsi və zəhmətkeşlərin maddi vəziyyətinin
yaxşılaşdırılmasına yönəldilib. Üçüncü hökumətin fəaliyyəti ərzində
fəhlələrin və qulluqçuların sosial vəziyyətinin yaxşılaşdırılması
məqsədilə konkret qərarlar qəbul edilib.
Azərbaycan hökuməti milliyyətindən asılı olmayaraq sosial vəziyyəti
ağır olanlara yardım göstərirdi. Məsələn, hökumət 1919-cu ildə
Müsəlman qadın xeyriyyə cəmiyyəti ilə yanaşı, rus və yəhudi
xeyriyyə cəmiyyətinə, erməni və yəhudi milli şuralarına və digər
cəmiyyətlərə uşaqların, qocaların və digər əhali qruplarının
saxlanılması üçün xeyli vəsait ayırıb, 1920-ci ilin fevralında
Gürcüstanda baş verən zəlzələ nəticəsində ziyan çəkmiş əhaliyə
yardım edib.
1919-cu il aprelin 14-də Nəsib bəy Yusifbəylinin rəhbərliyi ilə
təşkil edilən Xalq Cümhuriyyəti Hökumətinin 14 nazirdən ibarət
dördüncü hökumət kabinetində Aslan bəy Səfikürdski Ədliyyə və əmək
naziri təyin edilib. Həmin dövrdə inflyasiya ilə əlaqədar olaraq
müavinət və əmək haqlarının artırılması hökumətin sosial
siyasətinin əsas prioritetlərini təşkil edirdi. Elə bu məqsədlə
parlament Dəmir Yol Nazirliyinin xətti üzrə dəmir yollarında
işləyənlərin xidmət illərindən sonrakı təminatı haqqında
Əsasnaməni, habelə hökumət qulluqçuları və ibtidai məktəb
müəllimlərinin əməkhaqlarının artırılması, yaşayış minimumunun
qaldırılması haqqında qanunlar qəbul edib. Dördüncü hökumətin
fəaliyyəti dövründə qaçqınların problemlərinin həllinə dair bir
sıra qanun və qərarlar qəbul olunub...
Asif Nərimanlı
Yazı İqtisadiyyat Nazirliyi tərəfindən KİV nümayəndələri
arasında elan edilmiş “Azərbaycan Xalq Cümhuriyyəti dövrünün
iqtisadiyyatı” mövzusunda müsabiqəyə təqdim edilir
-
Magazin120:22
Müğənni Yalının qohumu sevgilisi tərəfindən qətlə yetirildi - FOTO
-
Dünya19:57
Zelenski onu yeni vəzifəyə təyin etdi
-
Magazin119:15
Talıb Talenin toyu olacaq: özündən 15 yaş kiçik xanımla... - VİDEO
-
Nida Xəbər 18:55
Ermənistanla sərhəddə işlərin 35 faizi yerinə yetirildi
-
Magazin118:00
"Elgiz və Zaur verilişinə getmək üçün mənə pul verir"
-
Nida Xəbər 17:25
İlham Əliyev Almaniyada mühüm tədbirdə çıxış etdi - Yeniləndi
-
Rəsmi xronika16:53
İlham Əliyevin Almaniya XİN rəhbəri ilə görüşü keçirildi
-
Nida Xəbər 16:06
İrəvandan Tehrana tərs şillə: Yeni qaz kəməri çəkilməyəcək