Vergilər Nazirliyində struktur islahatı: nələr edildi?

2018-ci ildə Vergilər Nazirliyinin Aparatında struktur ciddi islahatları aparılıb.

Publika.az xəbər verir ki, bu barədə Vergilər Nazirliyinin Media və kommunikasiya mərkəzinin hesabatında bildirilib.

Hazırda Nazirliyin Aparatının yeni strukturuna Sənədlərlə iş və vətəndaş müraciətlərinə baxılması departamenti, Vergi auditi, İqtisadi təhlil və ekspertiza, Vergi siyasəti, Vergi öhdəliklərinin icrasına nəzarət, Vergi ödəyicilərinə xidmət, Dövlət qeydiyyatı və uçota nəzarət, İkitərəfli və çoxtərəfli sazişlərin icrasına nəzarət, Hüquq, Yerli qurumların fəaliyyətinin əlaqələndirilməsi, Rəqəmsal vergi inzibatçılığı, İnsan resursları, Maliyyə, Daxili təhlükəsizlik departamentləri, habelə Media və Kommunikasiya Mərkəzi daxildir.
Struktur vahidlərinin funksional fəaliyyəti və vəzifələrinin bölgüsündə də dəyişikliklər aparılıb. Yeni strukturlar iyulun 2-dən fəaliyyətə başlayıb.

Vergilər Nazirliyində daha bir yeni struktur - İdxal-ixrac əməliyyatları üzrə nəzarət departamenti yaradılıb. Yeni qurum Dövlət Gömrük Komitəsi ilə birgə maliyyə nəzarəti sahəsində uçotun şəffaflaşdırılması, büdcə yığımlarının artırılması, qeyri-neft məhsullarının ixracı üzrə prosedurların sadələşdirilməsi, ixracın həcminin artırılması və bu istiqamətdə dövlətin fiskal siyasətini həyata keçirən orqanların fəaliyyətinə dəstək verilməsi, idxal-ixrac əməliyyatlarına nəzarət sistemini həyata keçirir.

Qeyd edək ki, Mikayıl Cabbarov 2017-ci il 5 dekabrda Vergilər naziri təyin edilib.