Dünya

“Ərəb Baharı”nın müəllifi Fransadan siyasi sığınacaq istədi

3 İyul 2015 16:24

2010-cu ildən ABŞ-ın diplomatik sənədlərini mətbuata sızdıraraq dünyanın gündəmini zəbt edən “WikiLeaks” saytının qurucusu Culian Assanj Fransadan siyasi sığınacaq istəyib.

Publika.az xarici mediaya istinadən xəbər verir ki, Assanj bu məqsədlə Fransa prezidenti Fransua Ollandın adına açıq məktub yazıb.

Məktub bu gün – Assanjın doğum günündə Fransanın “Le Monde” nəşrində dərc edilib. “WikiLeaks”ın qurucusu iddia edib ki, Amerika hakimiyyəti onu jurnalist fəaliyyətinə görə təqib edir.

“Yalnız Fransa siyasi təqiblərə qarşı lazımi müdafiəmi təşkil edə bilər. Cənab prezident, həyatım təhlükədədir. Mən yalnız psixoloji deyil, həm də fiziki təhdid altındayam”,- Assanj qeyd edib.

Qeyd edək ki, “Wikileaks”ın qurucusu 3 ildir Ekvadorun İngiltərədəki səfirliyində sığınacaq alıb. Assanj “Ərəb Baharı”nın “Wikileaks” saytının sayəsində baş verdiyini iddia edir.

Ömər Dağlı