AFFA Yeni il qabağı klubları “mükafatlandırdı”

Bu gün AFFA İntizam Komitəsinin növbəti iclası keçirilib.

Publika.az xəbər verir ki, İK Azərbaycan Premyer Liqasının 17 və 18-ci turlarında baş verənlərlə bağlı müvafiq qərarlar çıxarıb.

17-ci turun “Bakı” - AZAL matçında meydan sahiblərinin 4 futbolçusu sarı vərəqə ilə cəzalandığı üçün klub 1000 manat cərimə olunub.

“Xəzər Lənkəran” - “Qarabağ” matçında “Xəzər Lənkəran”ın 4 futbolçusu sarı vərəqə ilə cəzalandığı üçün klub 1000 manat cərimələnib. Oyunun 12-ci dəqiqəsində “Xəzər Lənkəran” klubunun azarkeşləri tərəfindən meydançaya kənar əşya atıldığına görə kluba 2000 manat cəza kəsilib.

“Sumqayıt” - “Qəbələ” qarşılaşmasında “Sumqayıt” klubunun 5 futbolçusu sarı vərəqə ilə cəzalandığı üçün klub 1000 manat cərimə olunub. Oyunun 89-cu dəqiqəsində “Sumqayıt” klubunun azarkeşləri tərəfindən meydançaya kənar əşya atıldığına görə kluba 2000 manat cəza tətbiq edilib.

“İnter” - “Neftçi” matçında “Neftçi” klubunun 6 futbolçusu sarı vərəqə ilə cəzalandığı üçün klub 1000 manat cərimələnib.

Azərbaycan Premyer Liqasının 18-ci turunun “Qəbələ” - “İnter” matçında “Qəbələ” klubunun 4 futbolçusu sarı vərəqə ilə cəzalandığı üçün klub 1000 manat cərimə olunub. Oyunun 87-ci dəqiqəsində “İnter” klubunun 10 nömrəli futbolçusu Elvin Məmmədov idmançıya yaraşmayan hərəkətə görə ikinci sarı vərəqə alaraq meydandan kənarlaşdırıldığı üçün 1 oyun cəzalanıb, kluba 200 manat cəza kəsilib.

Oyunun 79-cu dəqiqəsində “Qəbələ” klubunun qapıçısı Kamran Ağayev rəqibə bilərəkdən zərbə endirmiş, bu, hakimin gözündən yayınmışdır. Oyunun videoyazısını izlədikdən sonra İntizam Komitəsi aşağıdakı qərarları qəbul edib:

1. Oyunun 79-cu dəqiqəsində “Qəbələ” klubunun 1 nömrəli futbolçusu Kamran Ağayev rəqibə bilərəkdən zərbə endirdiyinə görə 3 oyun cəzalansın, klub 3000 manat cərimə olunsun.

2. Matçın hakimləri haqqında Hakimlər Komitəsi lazımi tədbirlər görüb İntizam Komitəsinə bildirsin.