Nida.az
Azərbaycan XXI əsrin iqtisadi möcüzəsinə necə çevrildi? – TƏHLİL
Ümumdünya İqtisadi Forumu (ÜİF) 2014-2015-cü illər üzrə dünya
iqtisadiyyatlarının rəqabətə davamlılıq reytinqini açıqlayıb.
Reytinqə görə, Azərbaycan dünya iqtisadiyyatının daha rəqabətə
davamlı ölkələri sırasına daxil olub və 144 ölkə arasında 38-ci
olub.
Hesabata görə, UİF-in makroiqtisadi sabitlik reytinqinin göstəricilərinə görə, Azərbaycan ilk onluğa daxil olaraq 9-cu pillədə qərarlaşıb, həmçinin, əmək bazarının effektivliyinə görə, Azərbaycan 33-cü yerdə mövqe tutur. İnnovasiya potensialının göstəricilərinə görə də Azərbaycan irəliləyərək 72-ci, texnologiya səviyyəsinə görə 56-cı, təsisatların keyfiyyətinə görə isə 60-cı yeri tutur.
Dünya iqtisadi mənzərəsində gənc Azərbaycan dövlətinin bu göstəriciləri ümumi müqayisələrə görə olduqca yüksəkdir. Bunu dünyanın aparıcı reytinq təşkilatları, iqtisadi ekspertləri də etiraf edir. Təsadüfi deyil ki, Avropanın inkişaf etmiş ölkələrində nümunə kimi göstərilən Azərbaycan iqtisadiyyatı öz inkişaf tempi və dayanıqlığı ilə iqtisadi siyasəti təcrübə olaraq öyrənilən ölkələrdəndir. Təbii ki, bu inkişafa və dayanıqlığa səbəb olan amillər var. Müasir dünya iqtisadiyyatında özəlləşdirmə, sahibkarlıq fəaliyyəti əsas funksiya olaraq qəbul edilir. Lakin iqtisadi böhranlar zamanı, bir sıra ölkələrdə sahibkarların iflasa uğraması, həmin dövlətin də iqtisadiyyatına böyük zərər vurub. Dünyanın aparıcı iqtisadi beyin mərkəzləri də məhz bu halların Azərbaycanda niyə yaşanmamasını araşdırır və bunu yüksək qiymətləndirirlər.
Sahibkarlığın inkişafı: dövlətin diqqəti və...
Azərbaycanın nail olduğu iqtisadi dayanıqlığı, ilk növbədə,
dövlətin iqtisadi mühitdə yaratdığı şəffaflıq, biznes fəaliyyətinə
başlamaq üçün sadəliyin təmin edilməsi və dövlət tərəfindən özəl
sektora göstərilən dəstəkdir. Təsadüfi deyil ki, ölkədə
sahibkarlığın inkişafının sürətləndirilməsi, biznes mühitinin
əlverişliliyinin daha da artırılması və biznesə başlama
prosedurlarının sadələşdirilməsi üçün zəruri tədbirlərin görülməsi
məqsədi ilə Prezident İlham Əliyevin “Sahibkarlıq fəaliyyəti
subyektlərinin fəaliyyətinin “bir pəncərə” prinsipi üzrə təşkilinin
təmin edilməsi tədbirləri haqqında” 2007-ci il 25 oktyabr tarixli
Sərəncamı ilə biznesə başlamaq proseduru kifayət qədər
sadələşdirildi. Belə ki, “bir pəncərə” sisteminin tətbiqindən sonra
biznesini qeydiyyatdan keçirmək istəyən sahibkar əvvəllər olduğu
kimi uzun müddət deyil, 3 gün gözləyir və tələb olunan
prosedurların sayı 15-dən 5-ə qədər azaldılıb. Bunun ardınca isə
sadələşdirmə prosesinin məntiqi davamı olaraq biznesə başlamaq
istəyən şəxsin elektron qeydiyyata alınması üçün həyata keçirilən
prosedurların sayı 6-dan 3-ə endirilib. Tələb olunan sənədlər isə
2-yə qədər azaldılıb.
Sahibkarlıq fəaliyyətinə tətbiq olunan vergi dərəcələri də azaldılıb. Belə ki, vergi dərəcələri tədricən 35 faizdən 20 faizə, ƏDV-nin dərəcəsi 28 faizdən 18 faizə endirilib, o cümlədən bir sıra vergilərin ləğv edilməsi, fiziki şəxslərin gəlirlərindən tutulan vergilərin dərəcələrinin maksimum həddinin isə 55 faizdən 35 faizə endirilməsi sahibkarlıq fəaliyyətinin stimullaşdırılması ilə nəticələndi.
Xarici investisiya necə cəlb edildi?
Bununla yanaşı, Azərbaycanda xarici investorların da fəaliyyətinin
asanlaşdırılması məqsədilə bir sıra işlər həyata keçirilir. Dövlət
başçısının “Azərbaycan Respublikası dövlət sərhədinin buraxılış
məntəqələrindən keçirilən malların və nəqliyyat vasitələrinin
yoxlanılmasında “bir pəncərə” prinsipinin tətbiqi haqqında” 11
noyabr 2008-ci il tarixli Fərmanına əsasən, bir sıra
dəyişikliklərin edilməsi, həmçinin, bir sıra güzəştlərin qəbul
edilməsi xarici investisiyanın Azərbaycanın şəffaf iqtisadi
mühitində fəaliyyətini genişləndirib. Həmin güzəştlərdən biri də,
Hasilatın Pay Bölgüsü haqqında Sazişlərdə (HPBS) və boru kəməri
layihələri üzrə sazişlər çərçivəsində fəaliyyət göstərən
podratçıların, onların agentlərinin və subpodratçıların idxal
rüsumunu ödəmədən və məhdudiyyətsiz neft-qaz sənayesi təyinatlı
əmtəələri Azərbaycana idxal və yenidən-ixrac edə bilməsidir. HPBS
rejimli idxala ƏDV 0 faiz tətbiq olunması da bu güzəştlər
sırasındadır. Eyni zamanda, “İxrac məqsədli neft-qaz fəaliyyətinə
xüsusi iqtisadi rejimin tətbiqi” haqqında qanuna əsasən, neft-qaz
sahəsində podratçıların və subpodratçıların ixrac məqsədli
fəaliyyətinə 0 faiz dərəcəsi ilə ƏDV tətbiq olunur. Məhz bu işlərin
nəticəsində bu gün Azərbaycana yatırılan investisiyaların həcmi
milyardlarla ölçülür.
İnsan İnkişafı İndeksi: dünya göstəriciləri iki dəfə
qabaqlandı
Son illərin ümumi reytinq cədvəllərində Azərbaycanın yeri ildən-ilə
yüksəlir. İlk növbədə ölkədə insan indeksinin inkişafı diqqət
çəkir. Belə ki, 2000-ci ildən bu yana Azərbaycan İnsan İnkişafı
İndeksinin artımının sürətinə görə dünya göstəricisini iki dəfə
qabaqlayaraq planetin “Top-15”liyinə daxil olub.
Tədqiqatlar göstərir ki, heç də iqtisadiyyatı sürətlə inkişaf edən ölkələrin hamısı Azərbaycan kimi insan inkişafı indeksini yaxşılaşdıra bilmir. Məsələn, son illər iqtisadiyyatları sürətlə artan Çin, Braziliya və Türkiyə kimi dövlətlər insan inkişafı indeksinə görə Azərbaycandan xeyli geridə qalırlar. Bu müqayisə Azərbaycan hökumətinin iqtisadi müstəvidə əldə etdiyi nəticələrin uğurla insanların sosial rifah müstəvisinə transformasiya etdiyinin göstəricisidir.
Bununla yanaşı, İnsan İnkişafı hesabatlarında Azərbaycanın uğurlu mövqelərindən biri də Gəlirlər üzrə Cini indeksində (gəlirlərin təmərküzləşmə əmsalı, gəlirin bölgüsündə qeyri-bərabərlik dərəcəsini miqdarca qiymətləndirməyə imkan verən statistik göstəricidir- red) ən aşağı həddə - 16.8-ə bərabər olmasıdır ki, bu da ölkəmizdə gəlirlərin əhali qrupları arasında planetin digər dövlətləri ilə müqayisədə ən ədalətli bölgüsünü ehtiva edir. Belə ki, “qeyri-bərabər bölgü də nəzərə alınmaqla adambaşına düşən gəlir” səviyyəsinə görə Azərbaycan dünyanın 50 ən güclü inkişaf etmiş ölkəsinin sırasına daxil olub. Məlumat üçün deyək ki, İnsan İnkişafı İndeksi – adambaşına gəlir, təhsil və səhiyyə səviyyəsi əsas götürülərək hesablanır.
Beynəlxalq reytinqlərdə Azərbaycan: pillə-pillə
irəli
Son 5 ildə Azərbaycan öz reytinqini artırması açıqlanan
hesabatlarda əksini tapır. Misal üçün, 2009-2010-cu illər üçün
hazırlanmış “Qlobal Rəqabətlilik Hesabatı”nda Azərbaycan 18 pillə
irəliləyərək, 133 ölkə arasında 51-ci yerə, MDB ölkələri arasında
isə 1-ci yerə yüksəldi.
“Doing Business-2009” və “Doing Business-2010” hesabatlarında
Azərbaycan biznes mühitinin yaxşılaşdırılması sahəsində ən
islahatçı ölkə olaraq göstərildi. Azərbaycan “Doing Business-2011”
hesabatında 69-cu yerdə qərarlaşdı. “Doing Business - 2012”
hesabatında ölkəmiz daha 3 pillə irəlilədi.
“Doing Business - 2013”də də bu irəliləyiş davam etdi. Ümumdünya İqtisadi Forumu (ÜİF) bundan əvvəlki reytinq hesabatlarında da pillə-pillə irəliləyən Azərbaycan 2014-2015-cü illər üzrə də deyildiyi kimi, 38-ci yerdə qərarlaşmaqla ötən ilki göstəricisini bir pillə də yaxşılaşdırdı. Azərbaycan bu göstəricini 144 ölkə arasında əldə edib. Bunu da xüsusi vurğulamaq lazımdır.
Beləliklə, Azərbaycan iqtisadiyyatının gələcək inkişafı ilə bağlı beynəlxalq təşkilatların proqnozları nikbindir. Bütün bunlar onu göstərir ki, sürətli inkişaf dövrünü yaşayan Azərbaycan inkişaf etmiş ölkəyə çevrilməyi qarşısına məqsəd qoyub və bu istiqamətdə inamla irəliləyir. Yaxın gələcəkdə dünya Azərbaycanı İnkişaf etmiş ölkələr sırasında gördüyü zaman təəccüblənməyəcək.
“Azərbaycan Avropanın ixracatçısına çevrilə
bilər”
İqtisadçı ekspert Vüqar Bayramlı Publika.az-a açıqlamasında
Azərbaycanın öz göstəricilərini yaxşılaşdırmasını ağıllı siyasətin
aparılması ilə yanaşı, Azərbaycan dövlətinin həssas məqamlarda
ehtiyatlı addımlar atması ilə əlaqələndirib. Ekspert qeyd edib ki,
bunu beynəlxalq reytinq təşkilatlarının hesabatlarından da görmək
olur.
“Azərbaycan qarşısında qoyduğu A zonasına daxil olmağı heç də
utopiya deyil. İqtisadi inkişaf Azərbaycanın tezliklə bu zonaya
daxil olacağını deməyə əsas verir. Nəzərə alsaq ki, Avropa
ölkələrinin bir çoxu böhranın fəsadlarından əziyyət çəkir, belə
halda böhranın təsir etmədiyi Azərbaycan üçün yeni imkanlar da
artır. Bu imkanlardan biri də ixracatçı ölkəyə çevrilməkdir.
Düzdür, bu gün Azərbaycan bir sıra ölkələrə müxtəlif məhsullar
ixrac edir. Lakin bunun genişləndirilməsi inkişafa daha müsbət
təsir göstər bilər. Bu mənada dünyanın hazırkı iqtisadi vəziyyətini
dəyərləndirərək, lazım olan imkanlardan istifadə etmək
lazımdır”.
Ekspert diqqətə çatdırıb ki, Azərbaycan Avropanın da ixracatçısına
çevrilə bilər ki, bunun üçün ölkənin imkanları genişdir.
Acından ölən Ermənistan: 85-ci yer, yoxsa şişirdilmiş
rəqəm?
ÜİF-in hesabatında diqqət çəkən məqam Ermənistanın
göstəriciləridir. Hesabata görə, Ermənistan 85-ci yerdə qərarlaşıb.
Bu Azərbaycan göstəricilərindən iki dəfədən də artıq geridə qalmaq
deməkdir ki, bunu təbii qarşılamaq olar. Çünki Azərbaycan
torpaqlarını işğalda saxlayan Ermənistanın faktiki olaraq rəsmi
Bakının sərt təcridetmə siyasəti nəticəsində bölgədəki bütün
beynəlxalq layihələrdən kənarda qalıb. Əhalisi acından ölmək
səviyyəsinə gələn Ermənistandan hər il yüzminlərlə insan mühacirətə
gedir.
Publika.az-a açıqlamasında Milli Məclisin Regional məsələlər üzrə
komitəsinin üzvü Fəzail İbrahimli isə hesab edir ki, Ermənistanla
bağlı göstəricilər şişirdilib: “Ermənistana çox hörmətlə
yanaşıblar. Çünki Ermənistanın hansı iqtisadi inkişafından söhbət
gedə bilər. Özünü heç bir inkişafı yoxdur, yalnız kənardan
yardımlar alır, erməni diasporunun maliyyəsi hesabına yaşayır.
Ermənistanın vəziyyəti “qızıl teştə qan qusmaq” kimidir.
Azərbaycanın torpaqlarının işğal edib, lakin acından ölürlər.
Regionda heç bir beynəlxalq layihələrdə yer ala bilmir.
Azərbaycanla, Türkiyə ilə sərhədləri bağlanıb, yalnız İranla
müəyyən münasibətləri var. Amma kənar dövlət başqa dövlətin
iqtisadi inkişafını təmin edə bilməz”.
Deputat qeyd edib ki, bu gün Ermənistana kənardan daxil olan pullar
yalnız əhalinin acından ölməməsinə sərf edilir.
Asif Nərimanlı
-
İdman01:15
Arda tarixi matçında belə qol vurdu - VİDEO
-
Qoroskop00:45
Günün qoroskopu: hadisələrin axarına müdaxilə etməyin, çünki...
-
Magazin126 Aprel 23:26
Xumar Qədimova daha bir məşhur şeiri mahnıya çevirdi - VİDEO
-
İnanc26 Aprel 23:02
Həcc ziyarəti ilə bağlı zəvvarlara XƏBƏRDARLIQ
-
Region26 Aprel 22:37
Başqa çıxış yolumuz yoxdur - Paşinyan
-
Hadisə26 Aprel 21:47
Dörd aylıq körpə binadan necə düşüb? - Hadisə yerindən GÖRÜNTÜLƏR
-
Magazin126 Aprel 21:35
Günelə nə olub? - Xəstəxanadan görüntüsünü paylaşdı və... - FOTO
-
Hadisə26 Aprel 21:10
Qırmızı işıqda keçən nazirin maşını aşdı - FOTO