• USD 1,7339 0,00% EUR 1,8651 +1,90%
    • GBP 2,2098 +0,44% RUB 0,0271 +0,37%

Elman Abdullayev Nalbandyanın cavabını verdi

  • Nida.az
  • 9 Sentyabr 2014 10:00
  • 532 Baxış
Elman Abdullayev Nalbandyanın cavabını verdi

“Ermənistan tərəfi dərk etməlidir ki, Ermənistanın Azərbaycana qarşı işğalının davam etməsi və Ermənistan silahlı qüvvələrinin Azərbaycanın işğal olunmuş ərazilərində fiziki mövcudluğu münaqişənin həlli prosesinə və regional sülh və sabitliyə ən başlıca təhdiddir”.

Publika.az-ın verdiyi xəbərə görə, bu sözləri Ermənistan xarici işlər naziri Edvard Nalbəndyanın avstriyalı həmkarı ilə keçirdiyi mətbuat konfransında səsləndirdiyi fikirləri şərh edən Azərbaycan Xarici İşlər Nazirliyinin (XİN) mətbuat xidmətinin rəhbəri Elman Abdullayev deyib.

E.Abdullayevin sözlərinə görə, NATO-nun Uels sammitində qəbul olunan yekun bəyanat bir daha Azərbaycan Respublikasının ərazi bütövlüyü, suverenliyi və beynəlxalq səviyyədə tanınmış sərhədlərinin toxunulmazlığı beynəlxalq birlik tərəfindən qəti şəkildə dəstəklənildiyini göstərir: “NATO-nun 4-5 sentyabr tarixində Uelsdə keçirilmiş sammitində NATO üzv dövlətlərinin dövlət və hökumət başçıları qəbul etdikləri yekun bəyanatda Azərbaycan Respublikasının ərazi bütövlüyü, suverenliyi və sərhədlərinin toxunulmazlığına dəstəyini ifadə edərək, Cənubi Qafqazda həlli uzadılmış münaqişələrin məhz bu prinsiplər əsasında həllinə çağırıblar. Bu bir daha onu göstərir ki, Azərbaycan Respublikasının ərazi bütövlüyü, suverenliyi və beynəlxalq səviyyədə tanınmış sərhədlərinin toxunulmazlığı beynəlxalq birlik tərəfindən qəti şəkildə dəstəklənir.

Ermənistan xarici işlər naziri tərəfindən Uelsdə NATO üzv dövlətləri tərəfindən qəbul edilmiş qərara qarşı ifadə edilmiş mövqe Ermənistanın çarəsiz durumunun təzahürüdür. NATO üzv dövlətlərinin qərarını şübhə altına almağa cəhd göstərən Ermənistan xarici işlər naziri bir daha ölkəsinin beynəlxalq hüququn prinsiplərinə hörmətsizliyini açıq şəkildə nümayiş etdirir. Tamamilə ziddiyyətli və başını itirmiş Ermənistan rəhbərliyinə xas olan bir tərzdə Ermənistanın xarici işlər naziri beynəlxalq ictimaiyyəti beynəlxalq hüququn norma və prinsiplərini pozmağa çağırır”.

“Öz ənənələrinə sadiq qalaraq, Ermənistanın xarici işlər naziri ölkəsinin rüsvayçı işğalçılıq siyasətini etiraf etmək və buna son qoymaq əvəzinə beynəlxalq ictimaiyyəti və ilk növbədə Ermənistan cəmiyyətini çaşdırmaq və Ermənistanın diplomatik məğlubiyyətinə uğursuz şəkildə bəraət qazandırmaq məqsədi güdür”, - E.Abdullayev bildirib.

Ömər Dağlı

Xəbər lenti

DAHA ÇOX XƏBƏR