Milli Məclisdən Hadi Rəcəbli təkzibi

Milli Məclis deputat Hadi Rəcəblinin fikirlərinin təhrif edildiyini açıqlayıb.

Parlamentin mətbuat xidmətindən Publika.az-a verilən məlumatda deyilir ki, son günlər bəzi kütləvi informasiya vasitələrində Milli Məclisin Sosial siyasət komitəsinin sədri Hadi Rəcəblinin adından belə bir açıqlama yayılıb ki, guya deputat “aldığım maaş mənə çatmır” deyib.

“Hadi Rəcəbli həmin məlumatı təkzib edib və o xəbəri qərəz kimi
dəyərləndirib. Bildirib ki, sosial sahədə uzun illər tədqiqat aparan elmlər doktoru, professor kimi mən həmişə deyirəm: “Təminatla tələbat düz mütənasibdir. Təminat yaxşılaşdıqca tələbat artır”. Ucuz sensasiya axtaran bəzi KİV-lər deputatın fikirlərini kontekstdən ayıraraq təhrif edib, öz maraqlarına uyğun formada yayıblar”, deyə məlumatda deyilir.

Qeyd edək ki, bir müddət əvvəl H. Rəcəblinin “İnteraz” saytına açıqlaması olaraq yayılmış xəbərdə deputat bildirmişdi ki, aldığı maaş ona çatmır.

“İnsanlar çox zaman deyir ki, pensiyam mənə çatmır. Mən də sizə deyirəm ki, heç mənim maaşım mənə çatmır. Maaşım orta pensiyadan 5 dəfə çox olsa da, bunun kifayət etməməsi bir reallıqdır. Bunu səbəbi odur ki, tələbatla təminat düz mütənasib deyil. İnsanlar təmin oluna-oluna, onların tələbatı da artır. Odur ki, təqaüdçülərin pensiya ilə bağlı iradları həm də, tələbatlarının artması ilə bağlıdır. Razıyam, pensiyalar bir az çox olsa yaxşı olar. Amma pensiya artdıqca bazarda qiymətlər də dəyişir, bunu da nəzərə almaq lazımdır” - deyə H. Rəcəbli söyləyib.

Asif