NATO Rusiyaya qarşı Bakıda qərargah qura bilər – İDDİA

Rusiyadakı iqtisadi böhran Ermənistan, Belarus, Tacikistan və Qazaxıstanı da vurdu. Böhran post-sovet ölkələri arasında yalnız Azərbaycan və Türkmənistana az təsir etdi. Çünki bu ölkələr zəngin karbohidrogen ehtiyatlarına malikdir və öz ehtiyatlarından ağıllı şəkildə istifadə edə bilirlər. Bunu xüsusilə Azərbaycan təcrübəsində demək mümkündür.

Publika.az xəbər verir ki, bu barədə Meksikanın “La Razon” nəşri MDB-dəki proseslərlə bağlı məqaləsində bildirir.

Nəşr hazırda Ermənistanın ağır iqtisadi durumda olduğunu yazıb. Çünki bu ölkə bir sıra sahələr üzrə Moskvadan asılıdır. İqtisadi böhrandan sonra isə vəziyyət daha da acınacaqlıdır. Misal üçün, ayaqqabı fabrikinin sahibi Manvel Qasparyan nəşrə bildirib ki, Rusiyaya ixrac 90 faiz azalıb.

Nəşr daha sonra NATO-nun Rusiyaya qarşı hücum planlarına toxunub.

“NATO diqqətini Rusiya üzərində cəmləmək üçün Yaxın Şərqi tərk edir. Əfqanıstanda hərbi əməliyyatları bitirdikdən sonra Şimal Alyansı diqqətini Avropaya yönəldir. Xüsusilə Şərqi Avropada əməliyyatlar genişlənəcək. Hədəf Rusiyanı beynəlxalq hüquq normalarına riayət etməyə məcbur etməkdir”, - deyə qeyd edilib.

Nəşrə görə, Şimal Alyansı Rusiyanı zəiflətmək üçün onun qonşularına diqqət yetirəcək: “Moskvanın ən zəif yeri olan Cənubi Qafqaz müstəvi olaraq seçilə bilər. Bu bölgədə yerləşən Gürcüstan NATO istiqamətində inteqrasiyanı sürətləndirib. Ermənistan hərbi və siyasi olaraq Kremlə bağlıdır. Azərbaycana isə böyük ümidlər var. Bu ölkə Moskva ilə münasibətləri normal səviyyədə saxlamaqda maraqlıdır. Eyni zamanda Qərblə də əməkdaşlıq edir. Hərbi quruculuğunda NATO ilə əməkdaşlığa da xüsusi yer verir. NATO bu ölkəni özünə tərəf çəkmək üçün fəaliyyətini sürətləndirə bilər və Rusiyaya qarşı burda öz qərargahını yarada bilər”.

Asif Nərimanlı