Nida.az
Hər kəsə divident gətirəcək layihə: Bakı “Köhnə Qitə”ni necə xilas edir? - TƏHLİL
“Köhnə Qitə”nin ağır günlərində Azərbaycanın önəmi xüsusilə seçilir. Rəsmi Bakının əsas təşəbbüskarı olduğu Cənub Qaz Dəhlizi layihəsi Avropa üçün xilas yolu hesab olunur. Təsadüfi deyil ki, Cənub Qaz Dəhlizi layihəsi üzrə Məşvərət Şurasının Bakıda keçirilən ilk iclasında da iştirakçılar bu məqamı xüsusi vurğuladı.
Publika.az Cənub Qaz Dəhlizi layihəsinin Azərbaycan və Avropa üçün
gətirəcəyi iqtisadi-siyasi dividentləri araşdırıb.
Cənub Qaz Dəhlizi layihəsi və Azərbaycan liderinin siyasi
iradəsi
Layihə 4 hissədən ibarətdir: “Şahdəniz - 2”, Cənubi Qafqaz boru
kəməri, Trans Anadolu Təbii Qaz Kəməri (TANAP) və Trans Adriatik
Boru kəməri (TAP).
Azərbaycanın ən böyük təbii qaz yatağı hesab olunan “Şahdəniz”in
ehtiyatları 1,4 trilyon kubmetr hesab olunur. Yatağın ilkin fazası
“Şahdəniz -1” 2006-cı ildə istifadəyə verilib və ildə 9 milyard
kubmetr təbii qaz istehsal edir. “Şahdəniz - 2” isə yatağın əsası
hissəsini təşkil edir və bu hissənin istismarı Cənub Qaz Dəhlizi
vasitəsilə 2018-ci ildə reallaşacaq. İlkin istismar 16 milyard
kubmetr nəzərdə tutulur. Bunun 6 milyard kubmetri Türkiyənin daxili
istehsalına sərf olunacaq, yerdə qalanı isə Avropaya
ötürüləcək.
Cənubi Qafqaz boru kəmərinin (Bakı-Tiflis-Ərzurum) inşası 2006-cı
ildə yekunlaşdırılıb. 691 kilometr uzunluğu olan kəmərin 443
kilometri Azərbaycan, 248 kilometri isə Gürcüstanın payına düşür.
Səngəçal terminalından başlanğıcını götürən kəmər Türkiyə-Gürcüstan
sərhədində tamamlanır. 2007-ci ildən etibarən “Şahdəniz” qazının
birinci hissəsi kəmərə vurulur. Bu kəmər Cənub Qaz Dəhlizi
layihəsinin ikinci hissəsidir.
“Nabucco” tarixə qovuşandan sonra Avropanın enerji təminində
suallar ortaya çıxdı. Belə bir məqamda Azərbaycan qazının Avropaya
çıxaran mövcud kəmərlərin istifadəsi gündəmə gəldi. 2011-ci ildə
Avropa Birliyi ilə Azərbaycan hökuməti arasında Xəzər qazının
birbaşa Avropaya çıxarılması haqda birgə bəyanat imzalandı və
TANAP-TAP layihələri ortaya çıxdı. 2012-ci ildə Azərbaycan və
Türkiyə hökumətləri bu layihə üzrə razılıq əldə etdi.
TANAP Türkiyənin 20 şəhərindən keçərək Türkiyə-Yunanıstan
sərhədində başa çatacaq. Azərbaycan tərəfinin məlumatına görə,
Dövlət Neft Şirkətinin, BOTAŞ və TPAO-nun ortaqlığı ilə yaradılan
TANAP layihəsi 7 milyard dollar sərmayə ilə 6 ildə həyata
keçiriləcək. İlk mərhələ 2018-ci ildə başa çatacaq. 2020-ci ildə
kəmərin buraxılış qabiliyyəti ildə 16 milyard kubmetrə, 2023-cü
ildə 23 milyard kubmetrə, 2026-cı ildə isə 31 milyard kubmetrə
çatdırılacaq.
TAP Cənub Qaz Dəhlizi layihəsində yekun mərhələdir.
Türkiyə-Yunanıstan sərhədindən başlayaraq Adriatik dənizinin dibi
ilə qazı daşıyacaq kəmər Albaniya ərazisindən keçərək İtaliyaya
qədər uzanacaq. 20 milyard kubmetr həcmində nəzərdə tutulan kəmərin
yükgötürmə qabiliyyəti sonrakı illərdə artırıla bilər.
Cənub Qaz Dəhlizi layihəsinin arxasında siyasi iradə Azərbaycan
Prezidenti İlham Əliyevə məxsusdur. Bunu yerli və xarici
analitiklər də dilə gətirir. 2011-ci ildə Brüssellə birgə bəyanata
imza atan İlham Əliyev 2014-cü ilin 20 sentyabrında, Avropanın əsas
neft arteriyası hesab olunan “Əsrin müqaviləsi”nin 20 illik
yubileyində layihənin təməlini atdı.
Prezident İlham Əliyevin təşəbbüsü ilə həyata vəsiqə alan layihə təkcə Azərbaycana yox, Avropanın ən azı 7 ölkəsinə iqtisadi və siyasi dividentlər gətirəcək.
Bəzi iddialar, yaxud Cənub Qaz Dəhlizi nədən
uzunömürlüdür?
Azərbaycan qazının Avropanı tam təmin etmək gücündə olmadığı haqda
bəzi iddialar səsləndirilir. Lakin buna baxmayaraq, Cənub Qaz
Dəhlizi Avropanın əsas təminat alternativi olaraq qalır.
Birincisi, Azərbaycanın təsdiq olunmuş qaz ehtiyatları 2,5 trilyon kubmetrdir. Bundan əlavə, proqnozlaşdırılan qaz ehtiyatları 5 trilyona qədərdir. TANAP və TAP-ın ötürücü qabiliyyəti ilkin mərhələdə daşınacaq 16 milyard kubmetrlə yekunlaşmır. Boru kəmərləri əlavə güc götürmə qabiliyyətinə malikdir və perspektivdə əlavə enerjinin ötürülməsinə uyğun şəkildə inşa olunub.
Digər tərəfdən, Cənub Qaz Dəhlizi layihəsinə əlavə mənbələrin
tapılması da gündəmdədir. Yaxın perspektiv üçün Türkmənistan, uzaq
perspektivdə isə İran əlavə mənbə olaraq düşünülür. Türkmən qaz
Transxəzərə boru kəməri, yaxud mayeləşdirilmiş formada dənizin
üzərindən Bakıya çatdırıla bilər. Hazırda Brüssel-Ankara-Bakı
üçbucağı bu istiqamətdə Aşqabadla danışıqlar aparır. Öz qaz
ehtiyatlarını daha çox Asiya bazarına çıxan Aşqabad isə Avropa
bazarları üçün 10 milyard kubmetr qaz ehtiyatı saxlayır. Sonrakı
mərhələlərdə bu rəqəm daha da arta bilər.
İran qazının Avropaya çıxarılması üçün da ən unikal variant Cənub Qaz Dəhlizidir. Hazırda İran və “altılıq” ölkələri arasında danışıqlar mütəmadi olaraq davam edir. Qərblə siyasi problemlər həllini tapacağı təqdirdə İran qazı da Cənub Qaz Dəhlizi layihəsi vasitəsilə Avropaya çıxarıla bilər.
Beləliklə, bu layihənin uzun ömürlüyü üçün üç mənbə - Azərbaycanın
qaz ehtiyatları, Türkmənistan və İran mənbələri var.
Bununla yanaşı, proqnozlara görə, son vaxtlar Avropada mavi
yanacağa olan ehtiyac aşağı düşür. Misal üçün, Ukraynanın “Zerkalo
Nedeli” nəşri yazır ki, 2011-ci ildən başlayaraq Avropanın qaza
olan tələbatı azalır.
Nüvə energetikası proqramlarına yenidən başlamağın əvəzinə Yaponiya
Avropaya mayeləşdirilmiş qaz verəcək. Bu qazın həcmi kifayət
qədərdir. Həmçinin, ABŞ-dan şist qazı yaxın günlərdə Avropa
bazarlarına çıxarılacaq. Digər tərəfdən, İraqdan da əlavə qaz
gətiriləcək. Belə olan təqdirdə, Cənub Qaz Dəhlizi layihəsinin
Avropaya gətirəcəyi mavi qaz kifayət edəcək.
Cənub Qaz Dəhlizi layihəsi Avropa üçün nə
deməkdir?
Rusiya - Ukrayna böhranından sonra Avropada bir məsələ aktuallığını
getdikcə artırdı: enerji istehlakı bir mənbədən asılı olmamalıdır.
Təbii ki, bu səbəbsiz deyildi. İlk növbədə Rusiya qaz istehsalından
istədiyi vaxt siyasi təzyiq kimi istifadə edirdi. Misal üçün,
2006-2009-cu illərdə Ukrayna ilə qaz alqı-satqısında qiymətlərdə
razılaşa bilməyən Rusiya Avropanın qazını kəsmişdi. Bu böhrandan ən
çox əziyyət çəkən isə Cənub-Şərqi Avropa ölkələri idi. Enerji
təchizatının şaxələndirilməsi deyiləndə Avropa üçün əsasən bu
regionun qazla təminatı önə çıxır.
Bu region Avropanın ən zəif nöqtəsi hesab olunur. Çünki söhbət
təkcə region ölkələrinin bir enerji mənbəsindən asılılığından
getmir, eyni zamanda, istehsalçının tələb etdiyi istənilən qiymətə
razılaşmaq məcburiyyəti də problem olaraq qalır. Misal üçün,
Makedoniya, Bosniya və Hersoqovina, Serbiya, Yunanıstan,
Bolqarıstan Rusiyadan mavi yanacağı 500 dollar civarında alırdı. Bu
onsuz da iqtisadi vəziyyəti yaxşı olmayan ölkələr üçün fantastik
məbləğdir. Lakin bütün çətinliklərə baxmayaraq, region ölkələri
eyni mənbədən asılılığı davam edir.
Məhz bu baxımdan, Cənub Qaz Dəhlizi Avropanın “zəif nöqtəsini”
gücləndirmək, iqtisadi baxımdan yanaşsaq, bazarda rəqabət yaratmaq
üçün önəmlidir. Azərbaycan qazının Avropa bazarına çıxışı avtomatik
olaraq qiymətlərin daha münasib olmasına da təsir edəcək.
Cənub Qaz Dəhlizi layihəsinin əsas özəlliklərindən biri də
kəmərlərin keçəcəyi ölkələrin bu və ya digər formada dividentlər
əldə etməsidir. Misal üçün, Makedoniya və Serbiya kimi ölkələr
kəmərin təhlükəsizliyini təmin etməklə gəlir əldə edəcəksə,
Yunanıstan milyardlarla dollar və milyonlarla yeni iş yeri
qazanacaq. Eyni vəziyyət Bolqarıstana və digər ölkələrə də aiddir.
Həmçinin, layihənin reallaşmasında iştirak edən 11 şirkətin mənsub
olduğu ölkələr də əlavə gəlir əldə edəcəklər.
Azərbaycanın gələcəyinə yatırılan kapital: Bakın qazanacağı
iqtisadi və siyasi dividentlər
Bakının müəllifi olduğu Cənub Qaz Dəhlizi bir sıra Avropa ölkəsinə
qazanc gətirməklə yanaşı, Azərbaycan üçün də iqtisadi və siyasi
divident baxımından önəmlidir.
Azərbaycan öz qaz ehtiyatlarının Avropa bazarlarına çıxarmaqla
kifayət qədər gəlir əldə edəcək. Bu ölkənin gələcək iqtisadi
həyatına ən unikal yatırımdır. Digər tərəfdən, layihəyə əlavə
mənbələr qoşulacağı təqdirdə tranzit haqqından gəlir götürüləcək.
Layihədə ARDNŞ-nin iştirakçı şirkət kimi payı var.
Layihədən əldə olunacaq siyasi dividentlər də xüsusi diqqət çəkir.
İlk növbədə, Avropanın enerji təminatındakı rolu Azərbaycanın
imicini xeyli yaxşılaşdıracaq. Digər tərəfdən, Cənubi Qafqazda
liderliyini möhkəmləndirən Bakının Avropa üçün əvəzolunmaz olduğu
bir daha özünü göstərəcək. Layihədə iştirak edən ölkələrdən tutmuş
bütün Avropa regionunda Azərbaycanla hesablaşmaq artıq istəklə yox,
məcburi olacaq. Azərbaycan rəhbərliyi bu siyasi dividentlərdən
yaxın gələcəkdə ərazi bütövlüyünün bərpası üçün lazımınca istifadə
edəcək.
Asif Nərimanlı
-
Qoroskop00:45
Günün qoroskopu: hadisələrin axarına müdaxilə etməyin, çünki...
-
Magazin126 Aprel 23:26
Xumar Qədimova daha bir məşhur şeiri mahnıya çevirdi - VİDEO
-
İnanc26 Aprel 23:02
Həcc ziyarəti ilə bağlı zəvvarlara XƏBƏRDARLIQ
-
Region26 Aprel 22:37
Başqa çıxış yolumuz yoxdur - Paşinyan
-
Hadisə26 Aprel 21:47
Dörd aylıq körpə binadan necə düşüb? - Hadisə yerindən GÖRÜNTÜLƏR
-
Magazin126 Aprel 21:35
Günelə nə olub? - Xəstəxanadan görüntüsünü paylaşdı və... - FOTO
-
Hadisə26 Aprel 21:10
Qırmızı işıqda keçən nazirin maşını aşdı - FOTO
-
Magazin126 Aprel 20:22
Müğənni Yalının qohumu sevgilisi tərəfindən qətlə yetirildi - FOTO