Nida.az
Avropa Oyunlarından sonra Qarabağda nə olacaq? – TƏHLİL
Riqa samitində rəsmi Bakının Azərbaycanın ərazi bütövlüyünün bərpası ilə bağlı tutduğu sərt mövqe, ardınca xarici işlər naziri Elmar Məmmədyarovun Moskvaya səfəri və səfər zamanı Kremlin münaqişənin həll olunması haqda müsbət açıqlamaları, daha sonra Qərbin hərəkətə keçməsi yaxın zamanlarda Qarabağın taleyində dəyişikliyin olması ehtimallarını artırır.
Hazırki məqamda münaqişənin açarını əlində saxlayan Rusiyanın
mövqeyində az da olsa dəyişiklik hiss olunur. Ola bilsin ki, Moskva
Qərblə açıq savaşda Cənubi Qafqazın əsas söz sahibi olan
Azərbaycanı yanına çəkmək üçün bu ritorikadan istifadə edir. Amma
mövcud situasiya və baş verən proseslər Rusiyanın siyasi ritorika
etmək imkanında olmadığını göstərir.
Hər gün daha da qızışan “qaz müharibələrində” Avropanın Rusiya
qazına qarşı əsas alternativi olan Bakının onun yanında olması
Moskvaya hava-su kimi lazımdır. Bu baxımdan, Azərbaycanın Avrasiya
İttifaqında yer almasını məmnuniyyətlə arzulayır. Lakin Bakı
mövqeyini qəti açıqlayıb: işğalçı dövlətlə eyni ittifaqda yer
almayacaq.
Yalnız ərazi bütövlüyü bərpa olunandan sonra bu məsələ müzakirə
mövzusu ola bilər. Təbii ki, Azərbaycan ərazi bütövlüyü bərpa
olunacağı təqdirdə, Avrasiya İttifaqında mütləq yer alacağını qəti
şəkildə bildirməməklə, bunun yalnız müzakirə mövzusu ola biləcəyini
deməklə siyasi manevr edir.
İndiki məqamda Rusiyanın tərəzinin Azərbaycan gözünə ağırlıq
verməkdən başqa yolu qalmır. Çünki Avrasiya İttifaqında yer alan
Ermənistan Avropa Birliyi ilə yeni imkanlar axtarışını davam
etdirir. Bu Rusiyanı qıcıqlandıran məqamdır. Digər tərəfdən,
regionda Rusiya üçün daha çox hərbi baza rolunu oynayan bu ölkənin
dəyəri Azərbaycanla müqayisədə çox aşağıdır. Kremlin hərbi baza
saxladığı Ermənistana istədiyi əmri vermək və icra etdirmək əzmində
olduğu da danılmaz faktdır. Deməli, Rusiyanın siyasi qərarlarda
Ermənistanın mövqeyini nəzərə almaq kimi dərdi də yoxdur.
“Dağlıq Qarabağ münaqişəsinin həllinin vaxtı
yetişib” – Sergey Lavrovun bir müddət əvvəl verdiyi bu
bəyanat Rusiyanın mövqeyindəki dəyişikliyi açıq şəkildə göstərdi.
Bu, eyni zamanda İrəvanın icraçı olması fikrini də
qətiləşdirir.
Lakin baş verənlər son günlər tez-tez səslənən “Rusiya
Qarabağı Azərbaycana qaytarır” fikrinin real olduğu da
demək deyil. Güman ki, danışıqlar prosesində yeni və əsaslı
elementlər dövriyyəyə girsin.
ATƏT-in Minsk qrupunun amerikalı həmsədri Ceyms Uorlik bir müddət
öncə yeni elementlərin anonsunu verdi.
“Minsk qrupunun həmsədrləri münaqişənin nizama salınması
prosesinə müəyyən yeni elementlər daxil edib. Bu elementlərin
qrupun üzv dövlətləri ilə uyğunlaşdırmağa ehtiyac var”, -
deyə amerikalı həmsədr bildirdi.
Bir neçə ay öncə həmsədrlər Qarabağ üçün ikinci Minsk konfransının
keçirilməsi üçün Belarusla danışıqlar apardı. Rəsmi Minsk konfransı
qəbul etməyə hazır olduğunu bildirdi. Bu məsələ reallaşmasa da,
hələlik qüvvədə qalır. Görünür, Uorlikin bəhs etdiyi yeni
elementlərin razılaşma prosesi gedir. Lakin amerikalı həmsədr hansı
elementlərdən bəhs etdiyini açıqlamır, daha doğrusu bu haqda
ictimaiyyətə məlumat verilmir.
Yeni proses nə vaxt başlaya bilər?
Bir çox analitiklər Bakıda keçiriləcək I Avropa Oyunlarından sonra
Qarabağ üçün yeni mərhələnin başlayacağına dair proqnozlar verir.
Bu münaqişənin həlli istiqamətində addımların oyunlara görə
saxlanıldığı anlamına gəlməməlidir. Sadəcə olaraq, haqqında bəhs
edilən yeni elementlər üzərində iş aparılır və güman ki, sentyabra
qədər nəticə əldə olunsun. Digər tərəfdən, Azərbaycan bütün diqqəti
böyük məsuliyyət tələb edən beynəlxalq idman yarışına ayırıb,
həmçinin, dünyanın da nəzərləri buradadır.
Hansı elementlərdən bəhs olunur?
Siyasi mühitə hakim kəsilən fikirlərdən biri I Avropa Oyunlarından
sonra müharibənin başlaya biləcəyidir. Doğrudur, bu ehtimal son
günlər bir qədər səngiyib.
Lakin Ukraynadan sonra nə Qərb, nə də Rusiya yeni münaqişə ocağını istəmir. Moskvanı sərhədlərinin dibində müharibənin olması narahat edirsə, Qərb üçün bu, regionda reallaşdırılan beynəlxalq layihələrə təhlükədir. Təbii ki, Azərbaycan müharibə yolunu heç vaxt istisna etmir və Ermənistanın da qorxduğu budur. Amma rəsmi Bakı situasiyaya görə ağıllı davranışı ilə həmişə seçilib. Dövlətin ən üst qatında münaqişənin ədalətli həlli məqamı həmişə diqqətlə izlənilir. Beləliklə, müharibə ehtimalı hələ ki, ən son olaraq qalır.
Amerikalı həmsədrin bəhs etdiyi elementlər ilk növbədə Minsk qrupu
formatının dəyişməsi ola bilər. Çünki Rusiyanın münaqişənin həllinə
cavabdeh olan bu qrupda tam təşəbbüsü ələ almaq cəhdləri Qərbdə
narahatlıqla izlənir. Lakin münaqişənin həllində Rusiyanın
hegemonluğuna qarşı olan ABŞ formatın dəyişməsini, ən azından irəli
sürülən formada baş verməsinə o qədər də maraqlı deyil. Söhbət,
Almaniya və Türkiyənin formata daxil olmasından gedir.
Prezident İlham Əliyevin bu ilin yanvarında Berlin səfəri zamanı
Angela Merkel bu istəyini açıq şəkildə dilə gətirdi. Ümumilikdə,
bunu Avropa Birliyinin mövqeyi hesab etmək olardı. Belə ki, Brüssel
də oyuna girmək və regionda öz maraqlarını təmin etmək istəyir.
Daha çox ermənipərəst olan Fransadansa, praqmatik almanların burda
olması bizə də sərfəlidir. Digər tərəfdən, təklif olunan Türkiyə də
Minsk qrupunda Azərbaycana lazımdır. Hələlik bu məsələ açıq olaraq
qalır. Hazırda hesab etmək olar ki, ABŞ Rusiyanın münaqişə
üzərindəki nəzarətini zəiflətmək üçün format dəyişikliyinə razılıq
verib və yeni elementlərdən biri budur.
Daha bir element uzaq ehtimal olsa belə istisna edilməyən Qarabağın
Azərbaycana qaytarılmasıdır.
Burda iki cəbhə və hər cəbhənin öz marağı var.
Rusiya: Yuxarıda qeyd etdiyimiz kimi, Moskva az da
olsa münaqişəyə baxışını dəyişdirməyə başlayıb və münaqişənin
tezliklə başa çatmasını istəyir. Rusiya uzun illərdir regiona təsir
etmə vasitəsi kimi istifadə etdiyi münaqişəni həll edərkən, yəqin
ki, daha çox qazanmaq istəyəcək. Yəni, ruslar üçün Ermənistan onsuz
da “əyalətdir”, Moskvaya Azərbaycan lazımdır. Azərbaycanın ərazi
bütövlüyünü həll olunması isə rəsmi Bakının dediyi kimi, bir çox
məsələlərin müzakirəsinə yol aça bilər.
Rusiyanın “həll üslubunda” daha bir detal da diqqət çəkir: Moskva Dağlıq Qarabağdan erməni əsgərlərini çıxarır, yerinə öz “sülhməramlılarını” daxil edir. Bakı haqlı olaraq buna qarşıdır. Çünki bu yenə də işğala bərabərdir.
Qərb: Ukraynadan sonra post-sovet məkanında
dondurulmuş münaqişələrin həlli gündəmə gəldi. Qərb daha bir
Ukrayna ilə qarşılaşmaq istəmir. Bu münaqişələr arasında Dağlıq
Qarabağ ön sıradadır. Təbii ki, Qərb münaqişənin həllində təşəbbüsü
Rusiyaya verib, Azərbaycanı itirmək istəmir. Bu baxımdan, Uorlikin
bəhs etdiyi yeni elementlərdə Vaşinqtonun Bakının marağını təmin
edəcək üsullar təqdim edəcəyi istisna deyil.
Bütün hallarda Qarabağ ətrafında Rusiya-Qərb qarşıdurmasının
qızışacağı ehtimalı güclüdür. Hər şey təxminən iki ay sonra – I
Avropa Oyunları bitəndən sonra bəlli olacaq. Erməni KİV-nin son
dövrlər bu vaxtı xüsusi vurğulaması və Ermənistan üçün arzuolunmaz
zamanın yaxınlaşması haqda şərhləri bu fonda diqqət çəkir.
Asif Nərimanlı
-
Gözəllik02:43
Onun tumu qızıl qədər dəyərli imiş... - Botoks effekti verir
-
Ekopublika.az02:19
Bakının bu ərazisi PLANA DÜŞDÜ - Tezliklə söküləcək
-
İdman01:15
Arda tarixi matçında belə qol vurdu - VİDEO
-
Qoroskop00:45
Günün qoroskopu: hadisələrin axarına müdaxilə etməyin, çünki...
-
Magazin126 Aprel 23:26
Xumar Qədimova daha bir məşhur şeiri mahnıya çevirdi - VİDEO
-
İnanc26 Aprel 23:02
Həcc ziyarəti ilə bağlı zəvvarlara XƏBƏRDARLIQ
-
Region26 Aprel 22:37
Başqa çıxış yolumuz yoxdur - Paşinyan
-
Hadisə26 Aprel 21:47
Dörd aylıq körpə binadan necə düşüb? - Hadisə yerindən GÖRÜNTÜLƏR