• USD 1,7339 0,00% EUR 1,8297 -1,20%
    • GBP 2,2001 +0,65% RUB 0,0270 -0,74%

Niyaməddin Orduxanlı: “Bütün dünyaya sübut etdik ki...”

  • Nida.az
  • 30 İyun 2015 18:56
  • 235 Baxış
Niyaməddin Orduxanlı: “Bütün dünyaya sübut etdik ki...”

Bu günə qədər 300-ə yaxın beynəlxalq əhəmiyyətli tədbirə, o cümlədən idman yarışlarına ev sahibliyi etmiş Azərbaycan I Avropa Oyunlarını da ən yüksək səviyyədə keçirdi. 17 gün ərzində bütün dünyanın, xüsusən də Avropa ailəsinin diqqəti Şərqin ilk Demokratik Respublikasının varisi, Cənubi Qafqazın lider dövlətində oldu.

Möhtəşəm açılış və bağlanış mərasimlərinin, bir-birindən maraqlı idman yarışlarının təşkili ilə Azərbaycan tarix yazdı. Heç şübhəsiz, bundan sonra keçirilən növbəti Avropa Oyunlarında Azərbaycanın adı hər zaman hörmətlə anılacaq, bu oyunların ilk dəfə ölkəmizdə keçirildiyi xatırlanacaq. Avropa məkanında ilk dəfə Bakıda keçirilən idman yarışlarının əhəmiyyəti, ona verilən qiymət, təşkilatçılığın səviyyəsi və digər məsələlərlə bağlı “Azadinform” İnformasiya Agentliyinin suallarını Bütöv Azərbaycan Xalq Cəbhəsi Partiyasının (BAXCP) sədr müavini Niyaməddin Orduxanlı cavablandırır:

- Niyaməddin bəy, Azərbaycanda 12-28 iyun tarixlərində I Avropa Oyunları keçirildi. Avropa məkanında ilk dəfə Bakıda reallaşan beynəlxalq idman tədbiri Sizdə hansı təəssüratı oyatdı, ümumiyyətlə, yarışlar necə keçdi?

- Müstəqil Azərbaycan dövləti tarixdə ilk dəfə idi ki, I Avropa Oyunlarına ev sahibliyi edirdi. Bu günə kimi bu cür tədbir olmamışdı. İlk dəfə fürsət yaranmışdı ki, Azərbaycan dövlətini milyonlarla insana göstərək, tanıdaq, ölkəmizlə bağlı əsl həqiqəti görsünlər. Yarışlar çox yüksək səviyyədə, demək olar ki, hətta Olimpiya oyunlarından da yüksək səviyyədə keçirildi. Bu tək mənim şəxsi qənaətim deyil. Bütün ictimaiyyətin, tədbirə gələn idmançıların, idman təşkilatlarının rəhbərlərinin və turistlərin gəldiyi fikirdir. Həqiqətən də biz bir dövlət olaraq bütün dünyaya sübut etdik ki, Azərbaycan ən inkişaf etmiş Avropa ölkələrindən - Almaniyadan, İngiltərədən, Fransadan və başqa ölkələrdən də üstün beynəlxalq idman yarışları keçirdə bilər və keçirtdik də.

- Cəmi 2 il yarım ərzində Azərbaycanın bu oyunlara bütün hazırlıqları başa vurmasını, təşkilatçılığını necə dəyərləndirirsiniz?

- 2 il yarım ərzində buna hazırlaşmaq və bunu çox yüksək səviyyədə keçirtmək doğurdan da böyük qəhrəmanlıq idi. Avropa Olimpiya Komitəsinin prezidenti Patrik Hikki özü də açılış mərasimində bunu qeyd etdi. Onlar gözləmirmiş ki, Azərbaycan dövləti 2 il ərzində bütün bunları başa çatdıra bilər. Özləri də etiraf etdi ki, bu inanılmaz hadisədir. Avropanın ən inkişaf etmiş ölkələri bu cür tədbirə ən azı 3-4 il əvvəldən hazırlıq işləri aparmalı idi. Şəxsən mən inanmıram ki, hansısa Avropa ölkəsi ilk Avropa oyunlarını Azərbaycan dövləti kimi bu cür təşkil edib, başa çatdıra bilərdi.

Təbii ki, Azərbaycanın bu uğura imza atmasının əsas səbəbkarı cənab Prezident İlham Əliyevdir. Həmçinin də onu xüsusi qeyd etmək istəyirəm ki, Prezident İlham Əliyevin Bakı - 2015 Avropa Oyunları Təşkilat Komitəsinin sədri vəzifəsinə Azərbaycanın birinci xanımı, hörmətli Mehriban xanım Əliyevanın təyin etməsi də düzgün seçim oldu. Həqiqətən də Təşkilat Komitəsinin sədri Mehriban xanımın və komitə üzvlərinin böyük zəhməti oldu. Bunu hər kəs də gördü. Kiçik bir nöqsan olmadan bütün işlər uğurla aparıldı. Böyük zəhmət hesabına bu uğura imza atıldı.

- Sizcə, I Avropa Oyunları Azərbaycana və Avropaya nə verdi?

- Məncə, Avropa Oyunları Azərbaycan üçün həm də siyasi mənada böyük əhəmiyyət kəsb edirdi. Biz dövlət olaraq daha çox siyasi divident götürə bildik. Bilirsiniz ki, uzun illərdir müstəqil Azərbaycan dövlətinin əleyhinə dünyada mövcud olan güclü erməni diasporu ilə ermənipərəst qüvvələr fəaliyyət göstərir. Müxtəlif üsullarla Azərbaycanı gözdən salırlar və bizim vətəndaşların böyük əksəriyyətinin İslam dininin daşıyıcısı olduğunu əsas götürərək, bizi “yarı vəhşi dövlət” kimi tanıtmağa cəhd edirdilər.

Heç kimə sirr deyil ki, bu gün Avropada, Qərbdə islamafobiya adı altında öz çirkin məqsədlərini həyata keçirirlər. Biz 50 Avropa ölkəsinə və başqa ölkələrə də göstərə bildik ki, Azərbaycan dünyəvi, hüquqi, demokratik bir ölkədir. Bizim ölkədə nəinki başqa din mənsubları, hətta ayrı-ayrı təriqət nümayəndələri də birgə yaşayır və onların heç birinin problemi mövcud deyil. Biz bir xalq olaraq həm də Avropa dəyərlərini daşıyırıq. Bizim ölkə tolerant bir ölkədir. Bütün bunları yüz milyonlarla insan öz gözləri ilə gördü. Erməni lobbisinin uzun illərdir əleyhimizə apardığı kampaniya darmadağın edildi. Bu da bizim ən böyük uğurlarımızdan biridir. Hər kəs Azərbaycan dövləti ilə bağlı əsl reallığı gözləri ilə gördü.

- Avropanın nəbzinin Bakıda döyündüyü 17 gün ərzində, eləcə də bu oyunlardan öncə Azərbaycanın konstruktiv və radikal müxalifətin davranışını necə qiymətləndirirsiniz?

- Bilirsiniz ki, mən də uzun müddətdir ki, konstruktiv bir partiyanın - BAXCP-nin rəhbər orqanında təmsil olunuram. 15 ilə yaxındır ki, BAXCP sədrinin müavini vəzifəsində çalışıram. Birmənalı şəkildə qeyd etmək istəyirəm ki, ölkəni təmsil edən konstruktiv partiyaların hamısı özünü şərəflə apardı və milli məsələlərdə həmişə olduğu kimi, bu dəfə də dövlətin yanında oldu. Ona qarşı aparılan çirkin kampaniyanın əleyhinə getdi. Birgə fəaliyyət oldu. Çox təəssüf ki, radikal müxalifət təmsilçiləri, xüsusən Əli Kərimli bu iki il ərzində hər gün öz fəaliyyəti ilə ilk Avropa Oyunlarına qarşı, Azərbaycana qarşı antikampaniyanın başında durdu. Milli maraqlarımızı sevməyən və buna görə ciddi narahatçılıq keçirdən bəzi beynəlxalq təşkilatların, qurumların yanında yer aldılar, durdular. Bütün enerjisini, gücünü Azərbaycan dövlətinin əleyhinə yönəltdilər. Bəzi beynəlxalq təşkilatlar təbii ki, bu siyasi düşərgədən çox məharətlə istifadə etdilər.

Ancaq ciddi bir iş görə bilmədilər. Radikal siyasi düşərgənin xalq arasında güclü sosial dayaqları yoxdur. Öz ətrafında olan adamların böyük əksəriyyəti bunlardan imtina edib siyasətdən gediblər. Bir adam ki, 25 ildir eyni siyasi mövqeyi bölüşür və indiyə qədər də heç bir uğur əldə etməyib, ondan yaxşı nə gözləmək olar? Bu adamların fikri, düşüncəsi ölkədə sabitliyin pozulmasına yönəlib. Bunu da xalq yaxşı görür. Odur ki, bu qüvvələrə dəstək vermir.

- Radikal müxalifətlə yanaşı, daxilimizdə “5-ci kolon” funksiyasını yerinə yetirənlər də bəzi xarici dairələrlə əlbir olub hər vəchlə I Avropa Oyunlarının əhəmiyyətini azaltmağa, ölkəmizin nüfuzuna xələl gətirməyə çalışırdılar. Onların bu çalışmalarının heç bir nəticə verməməsi, ölkəmizə qarşı aparılan kampaniyanın iflasa uğraması nəyin göstəricisidir?

- Sizinlə tam razıyam ki, bütün bu fəaliyyət ona yönəldilmişdir ki, ölkənin imicinə ziyan gəlsin. Bəzi beynəlxalq təşkilatların Avropa Oyunları qabağı verdiyi bəyanatlar sadəcə, bir bəhanə rolunu oynayırdı. 2-3 adamın hüququnun pozulması bu təşkilatları qətiyyən maraqlandırmır. Biz bir nəfərin də hüququnun pozulmasının tərəfdarı deyilik. Sadəcə bu təşkilatların necə riyakar siyasət aparmasını qeyd edirik. Yüz milyonlara vətəndaşımızın, nəinki hansısa bir hüququ, adi öz evində yaşam hüququ əlindən alınıb. Ermənistan dövləti rəsmən Azərbaycanın 20 faiz ərazisini işğal edib. Milyon yaxın soydaşımız didərgin düşüb. Xocalı soyqırımı törədilib. BMT Təhlükəsizlik Şurasının 4 qətnaməsi qəbul edilib. Niyə bu təşkilatlar bir dəfə də olsun bu hadisələri sadalamadılar? Müxtəlif bəhanələrlə, Azərbaycana təzyiq yolunu seçdilər. Ancaq heç bir nəticə əldə edilmədi. Utanmadan o cür təşkilatlar Avropa ölkələrindən gələn atletlərə müraciət etdilər ki, siz bir idmançı olaraq Azərbaycanda kiminsə hüququnun pozulmasını qabardın.

Nəticədə nə baş verdi? 50 ölkədən gələn 6000-dən çox idmançı bu təşkilatların bəyanatına əhəmiyyət vermədi. Bir nəfər idmançı da o cür bəyanata baş qoşmadı. Yalnız Azərbaycanda olan və özlərinin təsiri ilə fəaliyyət göstərən radikal müxalifət və “5-ci kolon” funksiyasını yerinə yetirən 5-10 adamdan başqa heç kim bunlara dəstək vermədi. Özlərini biabır etdilər. Onu da deyim ki, bütün bunların əsas səbəbi cənab Prezident İlham Əliyevin apardığı müstəqil siyasətlə bağlıdır. Əsl səbəb budur!

Rufik İSMAYILOV

Xəbər lenti

DAHA ÇOX XƏBƏR