Şagirdlər sınaq işlərini nümayiş etdirdi

Fevralın 17-də Təhsil Nazirliyinin "Müasir Azərbaycan Peşəkarları Layihəsi" çərçivəsində 18 nömrəli Bakı Peşə Liseyində “Bərbər” ixtisası üzrə tədris qrupunda təhsil alan şagirdlərin istehsalat təlimindən ixtisas sınaq işlərinin nümayişi təşkil edilib.

Publika.Az-ın nazirliyin saytına istinadən verdiyi xəbərə görə, tədbirdə müvafiq mütəxəssislər gələcək bərbərlərin peşə bacarıqlarına yiyələnmə səviyyəsini qiymətləndiriblər. Bu prosesdən sonra təhsilalanlar 4 ay müddətində istehsalat təcrübəsi keçəcəklər. İyunda dövlət buraxılış imtahanından uğurla keçən şagirdlər vahid formalı dövlət sənədi - diplom ala biləcəklər.

Qeyd edək ki, “Bərbər” ixtisası üzrə kadr hazırlığı 18 nömrəli Bakı Peşə Liseyi ilə “Eldar-studio” şirkəti arasında imzalanmış birgə əməkdaşlıq müqaviləsinə əsasən, həmin şirkətin peşəkar mütəxəssislərinin iştirakı ilə aparılır. Təhsilalanlar ən müasir avadanlıqlarla təchiz olunmuş tədris emalatxanasında təcrübi bilik və bacarıqlara yiyələnirlər.