Çılpaq cinayətkar zərgərlik mağazasını QARƏT ETDİ

Texasda hüquq-mühafizə orqanları zərgərlik salonunu qarət etməkdə və sonradan tamamilə çılpaq vəziyyətdə qaçmağa cəhd göstərməkdə şübhəli bilinən bir kişini saxlayıblar.

Publika.az xəbər verir ki, bu barədə "MYSanAntonio" portalı məlumat yayıb.

Hadisə 22 noyabrda baş verib. Polis ticarət obyektinin yaxınlığında yol qəzası barədə məlumat alıb. Araşdırma zamanı məlum olub ki, cinayətkar avtomobili demək olar ki, binaya çırpıb, sonra içəri girərək zinət əşyaları vitrinini dağıdıb və oğurladıqları ilə birlikdə qaçıb. Mağazanın 60 yaşlı müştərisi onu saxlamağa cəhd göstərsə də, avtomobilin qapısının zərbəsindən xəsarət alıb və xəstəxanaya yerləşdirilib.

Bir müddət sonra cinayətkarın avtomobili sürətli magistral yolda tərk edilmiş halda tapılıb. Saxlanılma zamanı şübhəli piyada qaçmağa cəhd edib, lakin tamamilə geyimsiz vəziyyətdə tutulub. Onun şəxsiyyəti açıqlanmır, yalnız 38 yaşında olduğu məlumdur. Hazırda əsas qarət ittihamı ilə yanaşı, ona bir sıra əlavə ittihamlar da irəli sürülüb.

Hüseyn İbadlı