ABŞ Rusiya silahına heyran qalıb: Toxunulmazdır

CNN Rusiyanın “Oreshnik” ballistik raketinin xüsusiyyətləri barədə məlumat yayıb.

Publika.az xəbər verir ki, nəşrin yazdığına görə, raketin hipersəs sürəti və uçuş trayektoriyası onu Ukraynanın mövcud hava hücumundan müdafiə sistemləri üçün faktiki olaraq toxunulmaz edir.

CNN-in məlumatına görə, “Oreshnik” raketi əksər müasir raketlərdən daha sürətli hərəkət edir və təxminən saatda 13 min kilometr sürət yığa bilir. Bu isə onun mövcud HHM sistemləri tərəfindən aşkar olunmasını və zərərsizləşdirilməsini xeyli çətinləşdirir.

Qeyd edilir ki, raketin əsas fərqləndirici xüsusiyyətlərindən biri birdən çox döyüş başlığı daşımaq qabiliyyətidir. Əsas raketdən hipersəs sürətlə altıya qədər çoxhədəfli döyüş başlığı ayrılıb buraxıla bilər və onların hər biri ayrı-ayrı hədəflərə yönəldilə bilər.

Bildirilib ki, bu tip raketlər əsasən nüvə başlıqlarının çatdırılması üçün hazırlanıb və həm nadir, həm də olduqca bahalı silah kateqoriyasına daxildir. CNN analitikləri bu texnologiyanı Soyuq müharibə dövründə yaradılmış oxşar sistemlərlə müqayisə edirlər.

Publika.az