İran "Starlink" avadanlıqlarının böyük partiyasını ƏLƏ KEÇİRDİ - İDDİA

İran kəşfiyyat orqanları sərhədyanı ərazidə "Starlink" peyk rabitə avadanlıqlarının böyük partiyasının ələ keçirildiyini açıqlayıb.

Publika.az xəbər verir ki, bu barədə BBC məlumat yayıb.

Rəsmi qurumların iddiasına görə, bu avadanlıqlar İranda “kəşfiyyat və təxribat fəaliyyəti” aparmaq məqsədi daşıyıb.

Məlumata görə, İran hökumətinin İlon Maska məxsus "Starlink" sisteminin siqnallarını bloklamaq cəhdlərinə baxmayaraq, bəzi İran vətəndaşları internetə çıxış üçün bu peyk rabitəsindən istifadə edir. Qeyd olunub ki, "Starlink"in İranda istifadəsi rəsmi şəkildə qadağandır.

Yanvarın 13-də İranın dövlət televiziyası avadanlıqların “qonşu ölkələrdən birindən qeyri-qanuni şəkildə ölkəyə gətirildiyini” bildirib. Konfiskasiya olunan yüklər arasında 100 uzaqməsafəli qəbuledici, 50 BTS siqnal gücləndiricisi, müxtəlif istehsalçılara məxsus 743 ədəd 5G modem və 799 ədəd son nəsil mobil cihaz yer alıb. Yayımlanan videomaterialda elektron avadanlıqlarla dolu qutular nümayiş etdirilib, bəzi qutuların üzərində "Starlink" loqosu açıq şəkildə görünür.

Hüseyn İbadlı