Tramp İran liderini şəxsən seçmək istəyir - “Maduro əməliyyatı” təkrarlanacaq

ABŞ Prezidenti Donald Tramp öldürülmüş dini liderin oğlunun namizədliyini qəti şəkildə rədd edərək, İranın yeni rəhbərinin seçilməsi prosesinə şəxsən nəzarət etmək niyyətində olduğunu bəyan edib.

Publika.az xəbər verir ki, bu barədə "Axios" nəşri telefon müsahibəsinə istinadla məlumat yayıb.

Bildirilib ki, Ağ Ev rəhbəri Tehranda daha əvvəl Amerika hərbçiləri tərəfindən Venesuelada həyata keçirilmiş siyasi rejim dəyişikliyi ssenarisini təkrarlamağı planlaşdırır.

“Onlar vaxt itirirlər. Xameneinin oğlu zəifdir. Venesuelada Delsi Rodrigeslə olduğu kimi, mən də bu təyinata qatılmalıyam”, - Donald Tramp bildirib.

Amerika lideri, hakimiyyətin ali rəhbər Əli Xameneinin ölümündən sonra bu posta əsas namizəd hesab edilən 56 yaşlı Müctəba Xameneiyə ötürülməsinə icazə verməyəcəyini açıq şəkildə nümayiş etdirib.

Prezidentin sözlərinə görə, əvvəlki kursun qorunub saxlanılması tamamilə qəbuledilməzdir, çünki bu, Birləşmiş Ştatları cəmi beş il sonra yenidən müharibə vəziyyətinə qayıtmağa məcbur edəcək. Tramp xarici idarəetmənin uğurlu nümunəsi kimi Nikolas Maduronun Amerika qüvvələri tərəfindən ələ keçirilməsindən sonra hakimiyyətə gələn və ABŞ-a neft tədarükünün bərpasını təmin edən vitse-prezident Delsi Rodrigesin rəhbərlik etdiyi Venesuelanı misal gətirib.

“Xameneinin oğlu mənim üçün qəbulolunmazdır. Biz İrana harmoniya və sülh gətirəcək birini görmək istəyirik”, - deyə ABŞ Prezidenti fikrini yekunlaşdırıb.

Hüseyn İbadlı