30 saat alovla mübarizə aparıblar: ABŞ-ın nəhəng gəmisindəki yanğının təfərrüatı

Amerika təyyarədaşıyan gəmisi “USS Gerald R. Ford”da baş verən yanğın 30 saatdan çox davam edib.

Publika.az xəbər verir ki, bu barədə gəmidəki dənizçilər “The New York Times” (NYT) qəzetinə bildiriblər.

Nəşr bildirib ki, "Yanğın gəminin camaşırxana otağındakı qurutma dəliyində başlayıb və tez bir zamanda yayılıb. Dənizçilər alovla 30 saatdan çox mübarizə aparıblar".

Yanğın barədə məlumat 12 martda verilib. ABŞ Hərbi Dəniz Qüvvələri əsas camaşırxana otaqlarında yanğın baş verdiyini açıqlayıb. Lakin yanğının səbəbinin döyüşlə əlaqəli olmadığı vurğulanıb.

Məlum olub ki, yanğında çoxsaylı şəxsi əşyalarla yanaşı, 600-dən çox heyət üzvünün çarpayıları da yanıb. Nəticədə dənizçilər "yerdə və masalarda yatmağa məcbur olublar". Bundan əlavə, yanğın nəticəsində camaşırxanalar məhv olduğundan, dənizçilər artıq paltarlarını yuya bilmirlər ki, bu da təxminən on aydır dənizdə olan bir gəmi üçün çox vacibdir.

Qəzet yanğını söndürərkən iki nəfərin ağır yaralandığını və onlarla dənizçinin dəm qazından zəhərləndiyini, lakin onların həyatlarının təhlükədə olmadığını aydınlaşdırıb. NYT-nin məlumatına görə, “USS Gerald R. Ford” gəmisində ümumilikdə 4500 dənizçi və gəmi daşıyıcısı pilotu var.

“Amerika əsgərləri döyüşməkdən yayınmaq üçün gəmini özləri yandırmış ola bilərlər”. Bu iddianı İran ordusunun “Xatəm əl-Ənbiya” Mərkəzi Komandanlığının sözçüsü irəli sürüb.

“Amerika təyyarədaşıyan gəmisi (...) gəmi heyətinin qorxusundan bir neçə Amerika hərbçisi tərəfindən Qırmızı dənizdə qəsdən yandırılıb”, - "Xatəm əl-Ənbiya" nümayəndəsi bildirib.

İran hərbi komandanlığının məlumatına görə, hadisə gəmi Oman körfəzinə doğru hərəkət edərkən baş verib.

Tural