Art

Azərbaycanlı rəssam dünya rekordçusu kimi tarixə düşdü - FOTOLAR

30 İyun 2026 14:02

Azərbaycan təsviri sənətinin tanınmış nümayəndəsi, Azərbaycan Dövlət Sənətçisi, professor Rəfiq Əziz (Rafiq Əzizov) “Geniuses World Record Association” tərəfindən dünya rekordçusu elan edilib.

Publika.az xəbər verir ki, təşkilatın təqdim etdiyi rəsmi sertifikata əsasən, Rəfiq Əziz Türkiyə muzeylərində 154 yağlı boya əsəri nümayiş olunan və yaradıcılığına görə Türkiyə Milli Zərbxanası tərəfindən üç xatirə gümüş sikkəsi zərb edilən ilk və yeganə müasir azərbaycanlı rəssam kimi dünya rekorduna layiq görülüb.

Uzun illərdir Türkiyədə fəaliyyət göstərən sənətkar 20 ildən artıqdır ki, Türkiyə Cümhuriyyəti Hərbi Dəniz Qüvvələri Komandanlığının baş rəssamı vəzifəsində çalışır. Bununla yanaşı, o, İstanbul Yeditepe Universitetində müəllim və professor kimi elmi-pedaqoji fəaliyyətini davam etdirərək gənc rəssamların yetişməsinə töhfə verir.

Rəfiq Əzizin əsərləri Türkiyənin hərbi və dövlət muzeylərində, eləcə də dünyanın müxtəlif ölkələrinin muzey və şəxsi kolleksiyalarında qorunur. Onun yaradıcılığı Azərbaycan təsviri sənətinin beynəlxalq aləmdə tanıdılması və təbliği istiqamətində mühüm rol oynayır.

2016-cı il noyabrın 1-də təqdim edilən sertifikatla Rəfiq Əzizin adı rəsmi olaraq dünya rekordçuları sırasına daxil edilib. Bu nailiyyət təkcə sənətkarın şəxsi uğuru deyil, həm də Azərbaycan mədəniyyətinin və milli rəssamlıq məktəbinin beynəlxalq səviyyədə qazandığı nüfuzun növbəti təsdiqi kimi dəyərləndirilir.