Zəngi tayfalarının tarixi irsinə həsr olunan film təqdim edildi - FOTO

Azərbaycan Respublikasının Mədəniyyət Nazirliyinin MyQrant layihəsinin dəstəyi ilə “İpək Yolu” Mədəni və Tarixi Araşdırmalar İctimai Birliyi tərəfindən hazırlanmış “Zəngilər” adlı qısametrajlı film və eyniadlı kitabın təqdimatı AMEA-nın Mərkəzi Elmi Kitabxanasında keçirilib.

Publika.az xəbər verir ki, tədbirdə ictimaiyyət nümayəndələri, jurnalistlər və elm xadimləri iştirak ediblər.

Tədbirin açılışında çıxış edən “İpək Yolu” Mədəni və Tarixi Araşdırmalar İctimai Birliyinin sədri, jurnalist Aida Eyvazlı Göytürk “Azərbaycan mədəniyyətində Zəngi tayfalarından qalmış ənənələr və yurdlar” layihəsinin əsas məqsədindən danışıb. O bildirib ki, Zəngi tayfalarının tarixi irsinin öyrənilməsi, yeni elmi məlumatların ictimaiyyətə təqdim olunması və bu istiqamətdə araşdırmaların təşviq edilməsi hər bir elm xadiminin vəzifəsidir. Onun sözlərinə görə, bu istiqamətdə maarifləndirmə işlərinə məktəblərdən başlanmalıdır.

Gənclər və tələbələr üçün nəzərdə tutulan “Zəngilər” kitabında və eyniadlı filmdə Zəngi tayfalarının tarixi ilə bağlı geniş məlumatlar yer alıb. Nəşrdə və filmdə türkoloq professor Firudin Cəlilov, AMEA-nın baş elmi işçisi Zaur Əliyev, Səmərqənd Dövlət Universitetinin dekanı Hazratkul Abroyev, araşdırmaçı jurnalist Hokim Sattori və misirli tədqiqatçı Əhməd Tarabikin araşdırmalarına istinad olunaraq Zəngi tayfalarının tarixi, mədəni irsi və türk dünyasındakı rolu haqqında ətraflı məlumat verilib.

“Zəngilər” qısametrajlı filminin müsahibi olan AMEA-nın baş elmi işçisi Zaur Əliyev qeyd edib ki, Azərbaycanın yeni təqdim olunan kitab və film bu gün Zəngəzur tarixinə və Azərbaycan tarixinin qaranlıq səhifələrinə işıq salır. Bu bir başlanğıcdır. Belə araşdırmalar gənc alimlər tərəfindən də davam etdirilməlidir.

Kitabın redaktoru Vəli Əkbər, tərtibatçıları isə layihə rəhbəri Aida Eyvazlı Göytürk və Ülkər Eyvazovadır. Qısametrajlı filmin quruluşçu rejissoru Vüsal Orucovdur.

Tədbirin keçirilməsində məqsəd qədim köklərimiz və tariximizi, Zəngəzur bölgəsindən çıxan qəhrəmanların izlərini onlara xatırlatmaqdır.