Avropa

İngiltərədə minlərlə tibb bacısı yenidən tətil edəcək

17 Yanvar 2023 02:50

Fevral ayında İngiltərədə tibb bacıları maaşların artırılması üçün kütləvi tətillər keçirəcək.

Publika.az xarici mətbuata istinadən xəbər verir ki, bu barədə Kral Tibb Bacısı Kollecinin saytında məlumat yayılıb.

Nümayişlərin fevralın 6-sı və 7-nə planlaşdırıldığı, onların hər birinin müddətinin 12 saat olacağı bildirilib. İlkin olaraq aksiyaya Milli Səhiyyə Xidmətinin 73 assosiasiyasının nümayəndələri qoşulacaq. Dekabrda keçirilən sonuncu aksiyada isə cəmi 55 birlik iştirak edib.

Qeyd olunub ki, bu ayın sonuna qədər maaşlarla bağlı vəziyyət dəyişməsə, planlaşdırılan tətillər keçiriləcək.

Xatırladaq ki, keçən ilin noyabrında britaniyalı tibb bacıları son 100 ildə ilk dəfə maaşlarını artırmaq üçün tətil edəcəklərini açıqlayıb. Aksiya keçirmək qərarı hökumətin danışıqlar təklifini rədd etməsindən sonra qəbul edilib.

Aytən Məftun