Banklara qarşı tələblər artırılır: normativlər dəyişəcək

"Banklar haqqında" Qanunda dəyişikliklər Azərbaycanda bankların və xarici bankların yerli filiallarının maliyyə sabitliyini təmin etmək məqsədilə prudensial normativləri və tələbləri Maliyyə Bazarlarına Nəzarət Palatasının müəyyən etməsini nəzərdə tutur.

Publika.az Milli Məclisin İqtisadi Siyasət, Sənaye və Sahibkarlıq, eləcə də Hüquqi Siyasəti və Dövlət Quruculuğu komitələrinin birgə iclasında bu haqda bildirilib.

Dəyişikliyə əsasən, yerli bankların və xarici bankların yerli filiallarının maliyyə sabitliyini təmin etmək məqsədilə yeni prudensial normativlər və tələblər də müəyyən edilib. Belə ki, qanunun “Prudensial normativlər və tələblər” maddəsinə 34.2.16-cı və 34.2.17-ci maddələr əlavə edilib. Bununla da, maliyyə bazarlarına nəzarət orqanı kredit təşkilatları tərəfindən nağd pulun saxlanılması və inkassasiyası, o cümlədən, kredit təşkilatlarında kassa əməliyyatlarının aparılması qaydaları ilə bağlı prudensial normativlər və tələblər də müəyyən edəcək.

İqtisadiyyat şöbəsi