Kreml “ikinci cəbhə” açılışını elan etdi

Kreml Ukraynaya qarşı “ikinci cəbhə”nin açılışını elan etdi.

Publika.az “Unian” agentliyinə istinadən xəbər verir ki, bu barədə Ukrayna Milli Təhlükəsizlik və Müdafiə Şurasının katibi Aleksandr Turçinov prezident Pyotr Poroşenkonun güc strukturlarının rəhbərləri ilə görüşündə deyib.

Onun sözlərinə görə, Rusiya sistemli şəkildə Ukraynada vəziyyəti gərginləşdirməklə məşğul olmağa qərar verib: “Bizim hərbçilərimiz Putinin planlarını dağıda və ölkənin şərqdə Rusiyanın işğal qoşunlarının hücumunu dayandıra bildilər. Kreml görür ki, planları iflasa uğrayıb və buna görə də ikinci cəbhəni - daxili cəbhə açır”.

Xatırladaq ki, dünən Ali Radanın qarşısında Milli Qvardiyanın hərbçiləri ilə nümayişçilər arasında genişmiqyaslı toqquşmalar baş verib. Ali Radanı mühafizə edən hərbi qulluqçuların üzərinə döyüş qumbarası atılıb. Qumbaranın partladılması nəticəsində, həmçinin qarşıdurmalarda 100-dən çox insan zərər çəkib. Milli Qvardiyanın hərbçisi 25 yaşlı İqor Debrin həyatını itirib.

Qeyd edək ki, Ali Rada dünən Konstitusiyaya dəyişikliklərin daxil edilməsi haqqında qanun layihəsini birinci oxunuşda qəbul edib.

Ömər Dağlı