Belarus XİN açıqladı: Qərb bunu istəmir

Qərb Belarusun Rusiya və Ukrayna arasında danışıqlar prosesinə cəlb edilməsinə qarşıdır.

Publika.az">Publika.az xəbər verir ki, bu barədə Belarus Xarici İşlər Nazirliyinin sözçüsü Anatoli Qlaz “Belarus-1” telekanalının efirində deyib.

O bildirib ki, Qərb Belarusu Rusiya Federasiyası ilə Ukrayna arasında razılaşmaların əldə edilməsi prosesinə cəlb etmək istəmir. Qlaz həmçinin qeyd edib ki, Qərb Belarusun maraqlarını “açıq-aydın nəzərə almaq niyyətində deyil və Minsk belə mövqeyi proqnozlaşdırıla bilən hesab edir.

“Bizim iştirakımız baxımından bir diplomat kimi deyim ki, hər hansı bir suveren dövlətin suveren dövlət kimi maraqlarının nəzərə alınmasını istəməsi və hətta haradasa tələb etməsi tamamilə normaldır. Bu, yeni təhlükəsizlik arxitekturasıdır. Biz indi bu haqda danışırıq. Ona görə də istəyimizə təəccüblənmək qəribədir. Təbii ki, bir sıra xarici oyunçular, Qərb tərəfdaşlarımız bunu istəməzdilər. Onlar Belarusun maraqlarını nəzərə almağı xoşlamırlar - bu, diplomatiya üçün də təbiidir, belə hallar olur. Biz onların mövqeyini nəzərə alırıq”, - sözçü bildirib.

Bundan əlavə, Qlaz bir müddət əvvəl Xarici İşlər naziri Vladimir Makeinin Aİ diplomatlarına açıq olmayan məktub göndərdiyi barədə məlumatı təsdiqləyib. XİN sözçüsünün sözlərinə görə, bu, adi bir təcrübədir.

Qlaz onu da bildirib ki, Belarus və Polşanın xarici siyasət idarələri ilə digər idarələri arasında dialoq prosesində bir çox təhlükəsizlik məsələləri həll oluna bilər: “Biz Polşa ilə dialoq aparırıq və indiyədək kəskin problemləri müzakirə edib aradan qaldıra bilmişik”.

Qlazın sözlərinə görə, Belarus Polşa ilə dialoqun inkişaf etdirilməsində israr etməkdə davam etmək niyyətindədir: “Biz bundan sonra da dialoqda israr edəcəyik, ondan əsas alətimiz kimi istifadə edəcəyik. Biz dialoqun tərəfdarıyıq”.