Dünya

Blinken kimin vasitəsilə Lavrova mesaj göndərib?

31 Yanvar 2023 17:30

Rusiyanın xarici işlər naziri Sergey Lavrov misirli həmkarı Sameh Şükri vasitəsilə ABŞ dövlət katibi Entoni Blinkendən Ukrayna ilə bağlı mesaj aldığını təsdiqləyib.

Publika.az xəbər verir ki, Lavrov danışıqlardan sonra keçirilən mətbuat konfransında TASS-ın sualını cavablandırarkən deyib: “Cənab nazir əvvəlki sualı cavablandırarkən bildirdi ki, o, bu yaxınlarda Qahirədə səfərdə olan dövlət katibi Blinkenin müəyyən mesajını çatdırıb. Mən bunu təsdiqləyirəm”.

O vurğulayıb ki, Rusiya bütün mövcud vəziyyətin “hərtərəfli kontekstində” həllinə yönəlmiş istənilən ciddi təklifi dinləməyə hazırdır.

Qeyd edək ki, yanvarın 31-də Moskvada Rusiya və Misir xarici işlər nazirlərinin görüşü baş tutub. Onlar beynəlxalq və regional problemləri, o cümlədən, Ukrayna böhranını müzakirə ediblər.

Aydan