“New York Times” məxfi sənədi üzə çıxardı: İsrail HƏMAS-ın hücumundan 1 il əvvəl xəbərdar olub

“The New York Times” 7 oktyabr hücumunun planını açıqlayan "Jericho Wall" kod adlı 40 səhifəlik sənəd əldə edib.

Publika.az xəbər verir ki, istintaqın məlumatına görə, bu sənəd bir ildən çox İsrail rəsmilərinin əlində olub. Lakin rəsmilər və ekspertlər HƏMAS-ın imkanlarının hücumu həyata keçirmək üçün kifayət etməyəcəyini düşünüblər.

“New York Times”ın nəzərdən keçirdiyi sənədlərə görə, onlar HƏMAS-ın oktyabrın 7-də həyata keçirdiyi hücum planını göstərir. Hakimiyyət İsrailin əlində olduğu öyrənilən bu sənədləri uydurma hesab edərək, xüsusi xəbərdarlıqlara məhəl qoymayıb. Nəşrin araşdırmasına görə, e-poçtlar və müsahibələr İsrail rəsmilərinin HƏMAS-ın hücum planını hadisədən bir ildən çox əvvəl əldə etdiyini göstərir. Lakin İsrail ordusu və kəşfiyyat rəsmiləri HƏMAS-ın hücumu həyata keçirməsinin çox çətin olduğunu nəzərə alaraq planı ciddi qəbul etməyiblər.

40 səhifəlik hücum planı

İsrail rəsmilərinin kod adını "Yerixo Divarı" qoyduqları təxminən 40 səhifəlik sənəddə 1200-ə yaxın insanın ölümü ilə nəticələnən dağıdıcı hücum təsvir edilib.

Sənəddə hücumun tarixi göstərilməyib, lakin Qəzza zolağı ətrafındakı istehkamları darmadağın etmək, İsrail şəhərlərini ələ keçirmək və diviziya qərargahı da daxil olmaqla, əsas hərbi bazalara hücum etmək üçün nəzərdə tutulmuş hücum təsvir edilib. HƏMAS planı şokedici dəqiqliklə işlənilib. Sənəddə hücumun əvvəlində raket zərbələri endirilməsi, pilotsuz uçuş aparatlarının sərhəddə təhlükəsizlik kameraları və avtomatik pulemyotları sıradan çıxarması, silahlı şəxslərin paraşüt, motosiklet və piyada kütləvi şəkildə İsrailə axışması qeyd olunub.

Kəşfiyyat sızması olub?

Plan həmçinin İsrail hərbi qüvvələrinin, rabitə mərkəzlərinin və digər həssas məlumatların yeri və ölçüsü ilə bağlı təfərrüatları ehtiva edirdi ki, bu da HƏMAS-ın kəşfiyyat məlumatlarını necə topladığı və İsrail təhlükəsizlik agentliyi daxilində sızmaların olub-olmaması ilə bağlı suallar doğurur. Əldə edilən məlumata görə, bu sənədlər uzun müddət İsrail hərbçiləri və kəşfiyyat rəhbərləri arasında yayılıb. Bununla belə, rəsmilər və ekspertlər bu miqyasda hücumun HƏMAS-ın imkanlarından çox uzaq olduğunu bildiriblər. Baş nazir Benyamin Netanyahu və ya digər yüksək səviyyəli siyasi liderlərin də sənədi görüb-görmədiyi məlum deyil.

Keçən il sənəd ələ keçirildikdən az sonra İsrail ordusunun Qəzza sərhədinin qorunmasına cavabdeh olan Qəzza bölməsinin rəsmiləri HƏMAS-ın niyyətlərinin aydın olmadığını bildirmişdilər. “Planın tam olaraq qəbul edilib-edilmədiyini və onun necə həyata keçiriləcəyini müəyyən etmək hələ mümkün deyil”, - “The Times” tərəfindən nəzərdən keçirilən hərbi qiymətləndirmədə deyilir.

İyulda daha bir xəbərdarlıq edilib

Daha sonra, iyul ayında, hücumlardan cəmi üç ay əvvəl, İsrailin siqnal kəşfiyyatı agentliyi olan Unit 8200-ün baş analitiki, HƏMAS-ın planda qeyd olunanlara bənzər intensiv, günlərlə davam edən təlimlər keçirdiyi barədə xəbərdarlıq edib. Lakin Qəzza bölməsinin hərbiçiləri buna ciddi yanaşmayıb.

"Mən ssenarinin uydurma olduğunu qəti şəkildə inkar edirəm" deyən analitik e-poçt yazışmalarında qeyd edib və deyib ki, HƏMAS-ın təlimi "Yerixo divarının məzmununa" tam uyğun gəlir. "Bu, müharibəyə başlamaq üçün nəzərdə tutulmuş plandır. Bu, sadəcə bir kəndə basqın deyil", - analitik elektron məktubda bildirib. Rəsmilər özəl olaraq etiraf edirlər ki, əgər hərbçilər bu xəbərdarlıqları ciddi qəbul etsəydilər və HƏMAS-ın hücum etdiyi cənuba əhəmiyyətli əlavə qüvvələr göndərsəydilər, İsrail hücumları dəf edə və hətta qarşısını ala bilərdi. Əvəzində, Qəzza zolağından terrorçular axışdığı üçün İsrail ordusu hazırlıqsız idi. Bu, İsrail tarixində ən ölümcül gün idi.

Cəmilə