Dünya

Obama İraqa göndərilən 1500 əsgərin missiyasını açıqladı

10 Noyabr 2014 22:45

Barak Obama İraqda 1,500 ABŞ əsgərinin yerləşdirilməsini İslam Dövləti silahlılarına qarşı mübarizənin “yeni mərhələsi" adlandırıb.

Publika.az-ın məlumatına görə, Amerikanın CBS TV kanalına müsahibə verən ABŞ prezidenti deyib ki, İraqa yeni göndərilmiş hərbçilər qrupu bilavasitə döyüşlərə qatılmayacaq müşavirlərdən ibarət olsa da, İD-ə qarşı həmlələrə kömək edəcək.

"Birinci mərhələ mötəbər və bütün qüvvələri əhatə edən İraq hökumətini yaratmaq idi. Biz buna nail olduq. İndi İraqın quru qüvvələri İŞİDİ geri oturtmalıdır" - Barak Obama bildirib.

Barak Obama müsahibəsində İraqa əlavə qoşun hissələrinin göndəriləcəyini də istisna etməyib. "Baş komandan olaraq mən heç vaxt “heç vaxt” deməyəcəm", - Obama əlavə edib.

Qeyd edək ki, ABŞ İraqa bu ölkənin xahişi ilə əlavə olaraq 1,500 əsgər göndərib. ABŞ hərbçiləri 9 İraq ordusu və 3 peşmərgə briqadasına təlim keçmək məqsədilə bir neçə mərkəz təsis edəcəklər.