Dünya

Putinlə Şoltsun söhbətinə hazırlıq gedir? - Kreml cavablandırdı

11 Noyabr 2024 15:30

Kremlə Almaniya hakimiyyətindən kansler Olaf Şoltsun Rusiya prezidenti Vladimir Putinlə söhbət etmək niyyəti ilə bağlı heç bir siqnal daxil olmayıb.

Publika.az xəbər verir ki, bunu Putinin mətbuat katibi Dmitri Peskov brifinqdə Şoltsun Rusiya lideri ilə dialoqun vaxtının tezliklə çatacağı ilə bağlı sözlərini şərh edərkən deyib.

“Bu yaxınlarda Valday Forumunda prezident təmaslara və danışıqlara açıq olduğunu bir daha təkrarladı. Şoltsla söhbətə heç bir hazırlıq görülmür, heç bir siqnal almamışıq. Valdayda Putin deyib ki, Şolts və Fransa prezidenti Emmanuel Makron özləri əlaqəni kəsiblər”, - Peskov bildirib.

Şolts noyabrın 10-da deyib ki, Putinlə danışmaq üçün “doğru zaman” tezliklə gələcək. O əlavə edib ki, belə bir söhbətdən əvvəl onun uzun müddətdir iştirak etdiyi çoxsaylı təmaslar olmalıdır.

Adəm Abbaslı