Dünya

Bu ölkədə hər yerdən neft fışqırır: xalqa da verəcəklər

28 Noyabr 2024 15:36

Cənubi Amerika ölkəsi Surinam neft və təbii qaz gəlirlərini xalqı ilə bölüşməyə hazırlaşır.

Publika.az xəbər verir ki, bu barədə Surinam prezidenti Çan Santoxi noyabrın 25-i Müstəqillik Günündə açıqlama verib.

O, hər bir surinamlının neft və təbii qaz gəlirlərindən faydalanmasını istədiklərini bildirib: “Bu fürsətdən hər kəs faydalanacaq və heç kim kənarda qalmayacaq. Siz neft gəlirlərinin ortaq sahiblərisiniz”.

Yeni proqram çərçivəsində yaşı 18-dən yuxarı olan hər bir Surinam vətəndaşının adına əmanət hesabı açılacaq və bu hesablara 750 dollar yatırılacaq. Dünya Bankının rəqəmlərinə görə, təxminən 600 min əhalisi olan Cənubi Amerika ölkəsinin illik ümumi daxili məhsulu 3,4 milyard dollardır. Bundan əlavə, hər 5 nəfərdən 1-i yoxsulluq içində yaşayır.

Ancaq ekspertlər neft və təbii qaz investisiyaları ilə ölkənin 10-20 il ərzində 10 milyard dollara yaxın gəlir əldə edəcəyini proqnozlaşdırırlar.

Roza