Çin və ABŞ arasında “müharibə” başladı: Bu səbəbdən

ABŞ-ın çip sənayesinə tətbiq etdiyi yeni məhdudiyyətlərə cavab olaraq, Çin Birləşmiş Ştatlara kritik mineralların ixracını məhdudlaşdırıb.

Publika.az xəbər verir ki, bu barədə Çin Ticarət Nazirliyi məlumat yayıb.

Bildirilib ki, müdafiə və silah sistemlərində geniş istifadə olunan qalium, germanium və surma kimi kritik mineralların, super sərt materialların ABŞ-a ixracı qadağandır.

Bəyanata görə, tədbirlər Çinin ixraca nəzarət qanunlarına uyğundur, milli təhlükəsizliyi təmin edir və nüvə silahının yayılmaması ilə bağlı beynəlxalq öhdəlikləri yerinə yetirir. Nadir metalların təxminən 70 faizini istehsal edən Çin qlobal emal gücünün 85 faizinə malikdir.

Qeyd edək ki, Çinin ABŞ-la bağlı qərarı Co Bayden administrasiyasının çip sektorunda Çinə əlavə məhdudiyyətlər tətbiq etməsindən sonra qəbul edilib.

ABŞ Ticarət Departamentinin Sənaye və Təhlükəsizlik Bürosu (BIS) bildirib ki, yarımkeçiricilərin hazırlanmasında istifadə olunan 24 növ çip istehsalı aparatına və 3 kateqoriya proqram təminatına ixrac məhdudiyyətləri qoyulub.

Məhdudiyyətlər çərçivəsində süni intellekt sistemlərində istifadə olunan Yüksək Bölmə Genişliyi Yaddaş (HBM) çiplərinin Çinə ixracı da qadağan edilib.

Roza