Ərdoğandan dünyanın gələcəyi ilə bağlı kritik açıqlama: Qarşıdakı 2-3 ayda...

Türkiyə prezidenti Rəcəb Tayyib Ərdoğan Qaziantepdəki Şahinbəy Xalq Kitabxanasında “Gənclərlə görüş”də çıxışı zamanı Beynəlxalq Cinayət Məhkəməsinin İsrailin baş naziri Benyamin Netanyahunun həbsi ilə bağlı qərarını şərh edib.

Publika.az xəbər verir ki, Ərdoğan bu qərarı İsrailə müxalif ölkələrin qələbəsi adlandırıb.

“Beynəlxalq Cinayət Məhkəməsi çox düzgün qərar verib. Lakin Netanyahu heç vaxt əvvəlki qərarlara tabe olmayıb. Buna da əməl olunmayacaq. Amma əməl etsə də, etməsə də, bu qərarın özü İsrailə qarşı olan ölkələrin qələbəsidir. Bu, çox vacib idi”, – deyə Ərdoğan bildirib.

Türkiyə prezidentinin sözlərinə görə, onlar indi Netanyahunun məhkəmə qərarlarına cavab olaraq hansı addımlar atacağına baxacaqlar.

O, həmçinin qeyd edib ki, dünya çox qeyri-adi bir dövr yaşayır.

“İndi Amerikada Tramp hökuməti hakimiyyətə gəlib. Baxaq görək Trampın rəhbərlik etdiyi yeni administrasiya ABŞ-da necə formalaşır. Bütövlükdə dünya tamam başqa gələcəyə doğru irəliləyir. Ona görə də qarşıdakı 2-3 ay bizim üçün çox önəmlidir”, - deyə Ərdoğan vurğulayıb.

Tural