Şoltsun kreslosu laxlayır: Almaniyanı nə gözləyir?

Bazar ertəsi parlament Almaniya kansleri Olaf Şoltsun hökumətinə etimadsızlıq səsverməsinə hazırlaşır. Onun gələn ilin əvvəlində növbədənkənar seçkilərdə uduzacağı gözlənilir.

Publika.az xəbər verir ki, bu barədə CNN məlumat yayıb.

Sol mərkəzçi Sosial Demokratlara (SPD) başçılıq edən Olaf Şolts fevralın 23-də növbədənkənar federal seçkilərin keçirilməsi ilə bağlı müxalifət partiyaları ilə razılığa gəlib.

Şolts əvvəlcə 15 yanvarda etimad səsverməsi keçirməyi planlaşdırdığını açıqlayıb, lakin dərhal sağ mərkəzçi Xristian Demokrat Birlik (CDU) partiyasının onu daha əvvəl keçirməsi ilə bağlı təzyiqinə məruz qalıb.

Şolts Almaniya tarixində ən az populyar kanslerlərdən biridir.

Rəy sorğularına əsasən erkən seçkilər təyin olunarsa, keçmiş kansler Angela Merkelin partiyası - mühafizəkar CDU qələbə qazana bilər.

Hazırda Fridrix Mersin başçılıq etdiyi CDU Xristian Sosial İttifaqı (CSU) ilə birlikdə Almaniyada müharibədən sonrakı dövrdə ən dominant qüvvə olduğunu sübut edib. Mersin kampaniyası Avropanın ən böyük iqtisadiyyatını stimullaşdırmaq üçün tədbirlərə, o cümlədən iş yerlərinin stimullaşdırılmasına və vergilərin azaldılmasına yönəlib.

Qeyd edək ki, Almaniya iqtisadiyyatı Covid-19 pandemiyası başlayandan bəri ilk dəfə keçən il azalıb. Avropa İttifaqının icraedici qolu olan Avropa Komissiyasının son proqnozlarına görə, bu il yenidən azalacaq.

Adəm