Senator Qərbi Rusiyaya qarşı Leninqrad mühasirəsini təkrarlamağa çağırır

Çexiya parlamentinin palata sədri, senator Miroslava Nemtsova Leninqradın (indiki Sankt-Peterburq-Red.) mühasirəsini təkrarlamağa çağırıb.

Publika.az xəbər verir ki, Avropa İttifaqının Rusiyaya qarşı sanksiyaları genişləndirmək qərarından sonra Nemtsova sosial media hesabından açıqlama verib.

O, sanksiyalar vasitəsilə rusların yenidən mühasirəyə alınmasını istəyib:

"Bu gün Rusiya Leninqradın İkinci Dünya müharibəsi zamanı mühasirədən azad edilməsinin ildönümünü qeyd edir. Hərçənd, onlar bayram etməli yox, eyni şeyi təkrar yaşamalıdırlar".

Çexiyalı siyasətçi Rusiyanı Qərbə qarşı hibrid müharibə aparmaqda ittiham edib və anti-Rusiya məhdudiyyətlərinin daha da sərtləşdiriləcəyinə ümid etdiyini bildirib.

Qeyd edək ki, Leninqradın mühasirəsi 8 sentyabr 1941-ci ildən 27 yanvar 1944-cü ilə qədər 872 gün davam edib və bu, müasir dünya tarixdə ən uzun mühasirələrindən biri olub. Bu müddət ərzində şəhərin təxminən 3 milyonluq əhalisinin demək olar ki, yarısı bombardmanlardan, xəstəliklərdən və aclıqdan ölüb.

Roza