Trampı öz silahı ilə vuran lider: ABŞ prezidentinin planları alt-üst olub

Demokrat Zöhran Məmdaninin Nyu-York meri seçilməsi ABŞ-da rezonans doğurmağa davam edir. Mətbuat qarşısında Məmdanini tənqid edən ABŞ prezidenti Donald Tramp iddialara görə, gənc meri əslində "ağıllı" hesab edir.

Publika.az xəbər verir ki, bu barədə "New York Times" yazıb.

Bildirilib ki, ABŞ lideri həftələrdir Məmdanini "ekstremist" və "kommunist" adlandırsa da, şəxsi söhbətlərdə onu "ağıllı" və "gözəl danışan" siyasətçi kimi təsvir edib.

Nəşrin təhlilinə görə, Məmdani Trampı öz silahı ilə məğlub etməyi bacarıb. Namizədliyi boyunca amerikalıların rifahını yaxşılaşdıracağına söz verən Tramp, iqtisadi çətinliklərlə mübarizə aparan milyonlarla amerikalının qəlbinə toxuna bilmişdi.

Məmdaninin merliyə namizədliyi zamanı verdiyi vədlər də demək olar ki, tamamilə şəhər sakinlərinin sosial-iqtisadi rifahı ilə bağlı idi. O, 10 il ərzində 200 min kirayə sosial mənzil tikməklə evsizliklə mübarizə aparacağını, uşaqlar üçün bələdiyyə uşaq bağçaları açacağını, bazarlar yaradacağını və şirkətlərə vergiləri artırarkən minimum əmək haqqını da artıracağını vəd edib.

Həmçinin qeyd olunub ki, Tramp Məmdanini Demokrat Partiyasının yeni siması kimi hədəf alır və iki şəxs arasında siyasi toqquşma qaçılmaz hesab olunur. Trampa yaxın mənbələr Mamdaninin yüksəlişini Trampın siyasi ritorikası üçün faydalı hesab edirlər. Bildirilir ki, ABŞ lideri keçmişdə Nensi Pelosi, Aleksandriya Okasio-Kortez və Corc Sorosu hədəf aldığı kimi, onu da "Demokratik ekstremizmin simvolu" kimi təsvir etməyi planlaşdırır.

Roza