Dünya

Napoleonun Vaterlooda itirdiyi broş rekord qiymətə satıldı - Foto

13 Noyabr 2025 06:46

Napoleon Bonapartın 1815-ci ildə Vaterloo döyüşündə məğlubiyyətindən sonra itirdiyi brilyant broş 3,5 milyon dollara satılıb.

Publika.az xəbər verir ki, bu barədə "Sotheby's" hərrac evi məlumat yayıb.

Cenevrədə keçirilən hərracda broş təxmini dəyərindən (150-200 min dollar) 14 dəfə baha qiymətə alıcı tapıb.

13,04 karat ağırlığında oval almazlı broşun diametri təxminən 4,5 sm-dir və əsas daşı əhatə edən təxminən 100 brilyantla bəzənib. Onun 1810-cu ildə hazırlandığı təxmin edilir.

Prussiya ordusu broşu Vaterloo döyüşündən sonra Napoleonun geri çəkilmə zamanı tərk etdiyi əşyaların arasında tapıb. Ehtimal edilir ki, o, qələbə halında şlyapasını onunla bəzəmək niyyətində olub. Broş Prussiya kralı III Fridrix Vilhelmə hədiyyə edilib, daha sonra şəxsi kolleksiyaya keçib.

Ləman