Türkiyə qara qutunu açdı

Noyabrın 11-də Gürcüstan-Azərbaycan sərhədində qəzaya uğrayan Türkiyə Silahlı Qüvvələrinin C-130 tipli hərbi nəqliyyat təyyarəsinin qalıqlarının əsas hissəsi yük maşınları ilə Türkiyəyə gətirilib.

Publika.az Teleqraf-a istinadla xəbər verir ki, bu barədə “Anadolu” agentliyi məlumat yayıb.

Bildirilib ki, hadisədən dərhal sonra yaradılan və bölgəyə göndərilən komanda araşdırmalarını davam etdirir:

“Ərazidə aparılan dəqiq işlərdən sonra təyyarənin qalıqları xüsusi diqqətlə yük maşınlarına yüklənib. C-130 tipli hərbi yük təyyarəsinin qalıqlarının böyük bir hissəsi ölkəyə gətirilib.

Qalıqların Milli Müdafiə Nazirliyinin Kayseridəki 2-ci Hava Nəqliyyat Vasitələrinin Təmiri Zavodunda araşdırılacağı bildirilir.

Bu arada təyyarənin qara qutusunun deşifrə edilməsinə də başlanılıb. Qəza yerində araşdırmalar tamamlandıqdan və qara qutunun analizi bitdikdən sonra qəzanın dəqiq səbəbinin müəyyən ediləcəyi gözlənilir. Komanda isə ərazidəki araşdırmalarını həftəsonuna qədər davam etdirəcəyi bildirilib.

Xatırladaq ki, noyabrın 11-də Türkiyəyə məxsus hərbi təyyarə Gürcüstanın Azərbaycanla dövlət sərhədindən təxminən 5 kilometr aralıda qəzaya uğrayıb. Təyyarə Azərbaycandan Türkiyəyə uçurdu.

Türkiyə Müdafiə Nazirliyi qəzaya uğrayan təyyarənin göyərtəsində 20 hərbçinin olduğunu açıqlayıb. Hadisənin baş vermə səbəbləri araşdırılır.