Ukrayna ATACMS raketləri ilə RUSİYANI VURDU

Ukrayna Rusiyanın ərazisindəki hərbi obyektlərə zərbə endirmək üçün uzaqmənzilli ATACMS raketlərindən istifadə edib.

Publika.az "RBK-Ukrayna"ya istinadla xəbər verir ki, bu barədə Ukrayna Ordusunun Baş Qərargahının "Telegram" kanalında məlumat verilib.

“Ukrayna Silahlı Qüvvələri ATACMS taktiki raket komplekslərini uğurla tətbiq edərək Rusiyanın ərazisindəki hərbi obyektlərə dəqiq zərbə endirib”, – Baş Qərargahın açıqlamasında deyilir.

Ukrayna müdafiəçilərinin hansı obyektləri hədəf aldığı hələlik məlum deyil.

Ukrayna hərbi komandanlığı vurğulayıb ki, bu hücum ölkənin suverenliyinə sadiqliyini göstərən əlamətdar hadisədir. Baş Qərargah əlavə edib ki, ukraynalılar rus hücumlarının daimi çağırışlarına baxmayaraq dözümlü qalır və qətiyyət nümayiş etdirirlər.

“Uzaqmənzilli zərbə vasitələrinin, xüsusilə ATACMS kimi sistemlərin tətbiqi davam etdiriləcək”, – deyə hərbçilər bildiriblər.

Xatırladaq ki, avqust ayında Wall Street Journal mənbələrə istinadən yazmışdı ki, ABŞ hakimiyyəti Ukraynanın Rusiyanın ərazisinə zərbə endirmək üçün uzaqmənzilli Amerika raketlərindən istifadəsini guya bloklayır.

Məlumata görə, Pentaqon yazın sonundan etibarən Ukraynaya ATACMS raketlərindən istifadə etməyə “icazə vermirdi”.

Hüseyn İbadlı