Qaroyanın Türkiyə qorxusu: Qarşısını yalnız belə almaq olar

Cənubi Kipr siyasətçisi Marios Qaroyan Yunanıstanın "To Manifesto" qəzetinə verdiyi müsahibədə Türkiyənin regional təsiri barədə təəccüblü açıqlamalar verib.

Publika.az xəbər verir ki, siyasətçi Türkiyənin Suriya, Liviya və Şərqi Aralıq dənizində güclü bir aktor kimi rol oynadığını qeyd edərək, bu vəziyyəti "revizionist güc" kimi təsvir edib.

Qaroyan Türkiyənin bölgədəki artan təsirinin onlar üçün təhlükə yaratdığını və müqavimət göstərməyin yalnız bir yolunun olduğunu bildirib: “Yunanıstan və Cənubi Kipr olaraq biz Ankaraya soyuqqanlılıq, güc və müttəfiqliklə qarşı çıxa bilərik. İki ölkənin Türkiyəyə qarşı birgə hərəkəti strateji zərurətdir. Ellinizmi iki dövlət və ortaq geosiyasi tale birləşdirir”.

Onun sözlərinə görə, Cənubi Kiprin regional məqsədlərinin müəyyənləşdirilməsində Türkiyənin təsirini görməzdən gəlmək qeyri-realdır: "Fürsət gördükdə vəziyyətdən istifadə etməliyik, amma illüziyalara qapılmamalı və diqqətli olmalıyıq".

Qaroyan Cənubi Kiprin Avropanın ən kritik geosiyasi bölgəsində yerləşdiyini söyləyib: "Ukrayna müharibəsi, Yaxın Şərqdəki böhranlar və Ai-nin enerji planları ada üçün imkanlar yaradır. Lakin Türkiyənin bölgədəki hərbi və siyasi varlığı bölgənin siyasi tənliyinin mərkəzindədir".

Siyasətçi son olaraq, Cənubi Kiprin İsrail ilə əlaqələrini qoruduğunu və Türkiyənin bu bölgələrdəki aktiv mövqeyinin bütün inkişaflara birbaşa təsir etdiyini qeyd edib.

Roza