İmamoğluna qarşı 450 min dollarlıq rüşvət iddiası: Ailəm təhlükədədir

İstanbul Böyükşəhər Bələdiyyəsinə (İBB) qarşı maliyyə cinayətləri istintaqı davam edərkən türkiyəli iş adamı Muhittin Erusta adlı şəxs tərəfindən yeni iddialar irəli sürülüb.

Publika.az "Haber7"yə istinadən xəbər verir ki, Erusta özünün və ailəsinin İBB keçmiş sədri Əkrəm İmamoğlu tərəfindən təhdid edildiyini bildirib.

Erustanın iddialarına görə, İmamoğlu ondan 450 min dollar rüşvət tələb edib.

"Pendik, Kurnaköydəki mədən sahəsinin bərpası layihəsi üçün bütün dövlət qurumlarından uyğunluq məktubu aldım. Mədən sahəsində ağac əkib dövlətə təhvil verməli idim. Lakin "İstanbul Su və Kanalizasiya İdarəsi" (İSKİ) müsbət rəy vermədi. Mən də əldə etməyə çalışdım. Nəticədə müxtəlif yerlərə yönləndirildim. Daha sonra bəzi insanlar müdaxilə edərək Fatih Keleş və Əkrəm İmamoğlu adından məndən 450 min dollar rüşvət istədilər. Bir qədər sonra sənədin verilməməsinin səbəbini soruşduqda "Əkrəm İmamoğlu qəti əmr verib, bu sənəd verilməyəcək" dedilər. İmamoğlu və CHP tərəfi məni təhdid edir. Ailəm təhdid altındadır", - deyə iş adamı qeyd edib.