İrana hücum planı üzə çıxdı: ABŞ bu silahlardan istifadə edəcək

ABŞ və İran arasında artan gərginlik fonunda analitiklər Vaşinqtonun mümkün hərbi zərbələri zamanı hədəf ala biləcəyi obyektləri müəyyənləşdirib.

Publika.az xəbər verir ki, bu barədə CNN məlumat yayıb.

Bildirilib ki, ABŞ-ın əsas hədəfləri İran İnqilab Keşikçiləri Korpusuna (İKK) məxsus komanda və idarəetmə mərkəzləri, eləcə də “Bəsic” qüvvələrinin və polis strukturlarının obyektləri ola bilər.

Analitiklər bildirir ki, bu obyektlərin əksəriyyəti böyük şəhərlərdə yerləşdiyindən mülki əhali arasında itkilər qaçılmaz ola bilər. Bu isə ABŞ-ın İrandakı etirazçılara dəstək mesajını zəiflədə və əks effekt yarada bilər.

Havayda yaşayan analitik, ABŞ Hərbi Dəniz Qüvvələrinin keçmiş kapitanı Karl Şuster deyir ki, hətta təsadüfən mülki şəxslərə zərər verən hər hansı bir hücum yalnız rejimə nifrəti ilə birləşən dissidentləri uzaqlaşdırmaq riskini daşıyır.

"İtkilər bizi azad edən qüvvədən daha çox, İranı boğmağa və ona hakim olmağa çalışan xarici dövlət kimi göstərir", - deyə o izah edib.

Bundan başqa, İran rəhbərliyinə məxsus yaşayış evləri və kommersiya obyektlərinin də mümkün hədəflər sırasında olduğu qeyd olunur.

Avstraliyadakı Qriffit Asiya İnstitutunun elmi işçisi Peter Leighton da potensial mülki itkilərlə bağlı xəbərdarlığı təkrarlayıb. Bununla belə, o, Vaşinqtonun sərəncamında müxtəlif hədəflərin olduğunu qeyd edib.

Ekspertlərin fikrincə, ABŞ İranın neft sektoruna da zərbə endirməklə ölkə iqtisadiyyatına uzunmüddətli təsir göstərməyə çalışa bilər.

Silah növlərinə gəlincə, məlumata görə, Vaşinqton B-2 bombardmançıları əvəzinə daha çox “Tomahawk” tipli qanadlı raketlərdən, JASSM uzaqmənzilli raketlərindən və pilotsuz uçuş aparatlarından istifadə edəcək.

1000 kilometrə qədər mənzilli JASSM qanadlı raketləri F-15, F-16 və F-35 qırıcıları, B-1, B-2 və B-52 bombardmançıları və ABŞ Hərbi Dəniz Qüvvələrinin F/A-18 qırıcıları da daxil olmaqla müxtəlif daşıyıcılardan buraxıla bilər.

Akqabay