İran Cənubi Koreyada “zibil torbaları” ilə bağlı qalmaqala səbəb oldu

Yaxın Şərqdə vəziyyətin gərginləşməsi fonunda Cənubi Koreya sakinləri xüsusi zibil torbalarına olan tələbatın kəskin artması ilə üzləşiblər.

Publika.az xəbər verir ki, hakimiyyətin qıtlıq olmadığı barədə bəyanatlarına baxmayaraq, əhali istehsalında neft məhsullarından istifadə edilən bu məhsulların bahalaşacağından narahatdır.

Təşviş içində edilən alış-verişlər qısamüddətli fasilələrə yol açmaqla cəmiyyətdə gərginliyi daha da artırır. Cənubi Koreyanın internet icmalarında və sosial şəbəkələrdə "qiymətlərin kəskin artımı ehtimalına qarşı ilkin tələbat mallarının siyahısı" aktiv şəkildə müzakirə olunur. Bu siyahılara zibil torbaları ilə yanaşı, qablaşdırılmış içməli su, tualet kağızı, şəxsi gigiyena vasitələri və uşaq ləvazimatları daxildir.

Hər bir rayon üçün icbari olan xüsusi markalanmış tullantı paketlərinə maraq xüsusilə böyükdür. Hər inzibati dairə üçün özünəməxsus nişanlanma tətbiq edildiyindən, bu paketləri onlayn qaydada və ya digər rayonlardan əldə etmək qeyri-mümkündür. Bəzi rayonlarda artıq bir nəfərə satılan paketlərin sayına məhdudiyyət qoyulub.

İqlim, Energetika və Ətraf Mühit Nazirliyi vurğulayır ki, bu cür tədbirlər preventiv xarakter daşıyır və tədarükdəki kəsintilərdən deyil, möhtəkirliyin qarşısını almaq istəyindən xəbər verir. Dövlət qurumları və sənaye nümayəndələri ölkədə zibil torbalarının qıtlığının müşahidə olunmadığına dair zəmanət verirlər.

Hüseyn İbadlı