ABŞ-dan Beynəlxalq Cinayət Məhkəməsinə qarşı görünməmiş addım

ABŞ prezidenti Donald Tramp administrasiyası Beynəlxalq Cinayət Məhkəməsinə (BCM) qarşı sanksiyalar hazırlayıb.

Publika.az xəbər verir ki, bu barədə “Reuters” məlumat yayıb.

Nəşrə danışan mənbələr bildiriblər ki, sanksiyalar paketinin tətbiqi ilə bağlı dəqiq tarix hələ müəyyən edilməyib. İndiyədək Vaşinqton yalnız BCM-in ayrı-ayrı hakim və prokurorlarına qarşı fərdi məhdudiyyətlər tətbiq edib. Yeni paket isə ilk dəfə olaraq məhkəmənin bütün fəaliyyətini əhatə edə bilər.

ABŞ Maliyyə Nazirliyi BCM-i sanksiya siyahısına daxil edərsə, amerikalı vətəndaş və şirkətlərə xüsusi lisenziya olmadan məhkəməyə maliyyə, mal və xidmət göstərmək qadağan ediləcək. Məhdudiyyətlərin bank əməliyyatları, sığorta, informasiya sistemləri, məlumatların saxlanması və əməkdaşların maaşlarının ödənilməsinə də təsir göstərə biləcəyi bildirilir.

Sanksiyaların ABŞ-dan kənardakı şirkətlər üçün də dolayı nəticələri ola bilər. Dollar sistemindən geniş istifadə edilməsi səbəbindən bəzi xarici bank və şirkətlərin ikinci dərəcəli risklərdən ehtiyat edərək BCM ilə əməkdaşlıqdan çəkinə biləcəyi qeyd olunur.

Müəllif: Roza