Məleykə Abbaszadədən 596 balla "kəsilən" abituriyentin işi ilə bağlı AÇIQLAMA: "Məhkəməyə verəcəyik" - (YENİLƏNDİ)

"Bu ilin qəbul kampaniyasının əsas mərhələsi başa çatıb və artıq ümumi nəticələr açıqlanıb. Proses tam şəffaf keçib".

Publika.az xəbər verir ki, bunu Dövlət İmtahan Mərkəzinin Direktorlar Şurasının sədri Məleykə Abbaszadə bu gün keçirdiyi mətbuat konfransında deyib.

O bildirib ki, DİM bu gün ümumi nəticələrlə bağlı tədbir keçirəcəkdi, lakin fövqəladə hal baş verdi: “Yüksək bal topladığı halda ali məktəbə qəbul olmadığını iddia edən abituriyent İbrahim Əsgərli və bu məlumatı sosial şəbəkədə paylaşan Kamran Əsədovu tədbirə dəvət etmişik. Bizim bu məsələ ilə bağlı mövqeyimiz açıqlanıb. Hər bir abituriyentlə bağlı məlumatı yalnız onun razılığı əsasında açıqlaya bilərik. Biz hətta qanun pozuntusuna yol verən abituriyentlər haqqında belə fərdi məlumatları yaymırıq”.

Daha sonra M.Abbaszadə İ.Əsgərlinin valideynlərinin razılığı əsasında onun imtahan nəticələri barədə açıqlama verib: “Hər bir abituriyent imtahan verəndən iki gün sonra onun bal arayışı hazır olur. Hətta onun cavab kartının qrafik təsviri də internetdə verilir. Sonuncu imtahan iyul ayının 26-da keçirilib. İbrahim Əsgərli yaz imtahanında 410 bal, yay imtahanında 451 bal toplayıb. İnternet saytda həmin abituriyentin arayışı, qrafik təsviri də verilib.

Cavab kartları oxunan zaman bizim işimizi Xüsusi Mühafizə Xidmətinin işçiləri müşahidə edir. Kartlar qapalı arxivə vurulur, möhürlənir. Bizim o kartlara əlçatmaq imkanımız yoxdur. İnternetdə yerləşdirilmiş kartlarda bütün məlumatlar əks olunub. Ona görə də bu abituriyentin 596 bal toplaması barədə iddiası qəbul olunmur. Biz cavab kartlarını yalnız məhkəməyə təqdim edirik. Bu məsələnin ictimailəşdirilməsini nəzərə alaraq Xüsusi Mühafizə Xidmətinə müraciət etdim. Bizim işgüzar nüfuzumuza zərər vurulduğuna görə bu məlumatı ictimailəşdirən ekspert Kamran Əsədovu məhkəməyə verəcəyik. Biz ondan təkzib etməsini istədik, lakin etmədi, ona görə də onu məhkəməyə verəcəyik. Bu məsələni nə biz, nə valideyn ictimailəşdirib. Valideynlərdən biri bizim, Xüsusi Mühafizə Xidmətinin əməkdaşı və bir media nümayəndəsi ilə möhürlənmiş yerdən kartları götürüb baxsın”.

Daha sonra çıxış edən İbrahim Əsgərlinin valideyni bildirib ki, imtahan nəticələri barədə göndərilən mesajda övladının 596 bal topladığı qeyd olunub.

Təhsil eksperti Kamran Əsədov isə çıxışında bildirib ki, abituriyent və ailənin razılığı əsasında məlumatları paylaşıb: “Məqsəd sizin işgüzar nüfuzunuza zərər vurmaq deyil. Məqsəd bu məsələni aydınlaşdırmaq idi”.

M.Abbaszadə bildirib ki ,kompüter proqramları ilə əlaqədar nəticələrin saxtalaşdırılması mümkündür, lakin bizim sistemə hər hansı bir müdaxilə mümkün deyil. Ya kodu sizə səhv göndəriblər, ya da fərqli sistemlə daxil olub nəticəni dəyişdiriblər. İstəmirəm ki, hər hansı haker proqramlarının adını sadalayım. Lakin bir kompüterdə nəticəni dəyişdirmək mümkündür. Ola bilər ki, heç sizin övladınız imtahanda iştirak etməyib. İbrahim Əsgərlinin sınaq imtahanında nəticələri 279, 428, 512 bal olub. Əgər bizim nəticələrimizdən razı deyilsinizsə, məhkəməyə müraciət edin. Siz müraciət etməsəniz, biz edəcəyik. Bəzən uşaqlar valideynlərdən qorxduqlarına görə nəticələrini dəyişə bilirlər. Belə hallar olur. Onlar da çox gözəl bilir ki, bu fayllar üzərində iş aparıblar. Bəlkə də, kodlaşdırma üçün müraciət etdikləri şəxslər onları aldadıb. Təəssüf ki, sənəd vermə prosesində üçüncü şəxslərə müraciət edirlər, bəzən abituriyentlər öz kodlarını bilmirlər.Təəssüf ki, bu proses ətrafında kimlərsə biznes qurur, bu zaman abituriyent və valideynləri aldadırlar. Bəzən isə abituriyent özü valideyni aldadır. Bizim bu prosesdə heç bir marağımız yoxdur. Hər kəs topladığı balla bağlı məlumatları imtahan bitəndən sonra əldə edib”.

Gülxar