Valideynlər ayağa qalxdı: Belə bir fənnin tədris olunmasını istəmirik

Belçika məktəblərində sekslə bağlı fənnin keçirilməsinə etiraz edirlər.

Publika.az xarici mediaya istinadən xəbər verir ki, Belçika polisi məktəblərdə seks və cinsi oriyentasiya ilə bağlı yeni məcburi fənnin tətbiqindən valideynlərin narazı olduğu Şarlerua şəhərində yanğına cəhdlə bağlı araşdırmaya başlayıb. Bu barədə "SudInfo" məlumat yayıb.

Naməlum şəxslər tərəfindən məktəb binalarının gecə saatlarında yandırılması cəhdinin dörd epizodu üzrə araşdırma aparıldığı bildirilir. Qeyd olunur ki, məktəblərin divarlarına qara hərflərlə bu sözlər yazılıb: “No Evras”(Sekslə bağlı dərs istəmirik).

Məlumata görə, ildə 2 saat keçiriləcək bu dərsdə iştirak 11-12 və 15-16 yaşlı məktəblilər üçün məcburidir. Bildirilib ki, sözügedən fənn cinsiyyətçilik, cinsi zorakılıq və gender stereotipləri daxil olmaqla bir sıra həssas mövzuları əhatə edir.

Etirazçılar isə belə bir fənnin məktəblərdə hiperseksuallığın və cinsi oriyentasiyanın dəyişdirilməsinin təbliğatına yol açacağından qorxurlar. İslam və Katolik təşkilatları da valideynləri etiraza çağırıb.

Mehti Kamiloğlu