İdeal dəriyə qovuşmaq üçün 3 maska

Çobanyastığı dərini sakitləşdirir və dəridəki qüsurları yox edir. Dərinin nəm balansını qoruduğu üçün ondan xüsusilə quru dəri tipinə sahib olanlar istifadə etməlidir.

Publika.az çobanyastığından hazırlanan ən effektli 3 maskanı təqdim edir:

Yulaflı çobanyastığı maskası

Bu maska ölü hüceyrələri təmizləyir və dərini yeniləyir.

Tərkibi:

Yarım stəkan yulaf

Bir çay qaşığı qabartma tozu

Bir xörək qaşığı bal

İki xörək qaşığı şəkər tozu

Stəkanın dörddə biri qədər çobanyastığı çayı (10 dəqiqə dəmlənməlidir)

Bütün məhsulları qarışdırın. Maskanı üzünüzə çəkib

5 dəqiqə gözləyin, daha sonra üzünüzü ilıq su ilə təmizləyin.

Zeytun yağlı çobanyastığı maskası

Bu maska dərini nəmləndirir, yaşlanma əlamətlərini aradan qaldırır.

Tərkibi:

Stəkanın dörddə biri qədər zeytun yağı

Yarım stəkan şəkər tozu

Bir çay qaşığı qurudulmuş çobanyastığı

Bütün məhsulları bir qaba töküb qarışdırın. Əvvəlcə üzünüzü ilıq su ilə yuyun, daha sonra maskanı çəkib 10­20 dəqiqə gözləyin. Maskanı soyuq su ilə təmizləyin.

Badam yağı və çobanyastığı

Maska dərinin rəngini açır və dəridəki qızartıları yox edir.

Tərkibi:

Bir çay qaşığı qurudulmuş çobanyastığı

Bir xörək qaşığı toz halına salınmış yulaf

İki xörək qaşığı bal

İki-üç damcı badam yağı

Məhsulların hamısını bir kasaya töküb yaxşıca qarışdırın. Maskanı təmiz dəriyə çəkib dairəvi hərəkətlərlə masaj edin. İyirmi dəqiqə gözlədikdən sonra üzünüzü ilıq su ilə təmizləyin.

Ləman Sultan